Pasaiako udalekuetan begirale izan nahi?
Astelehenean zabalduko dituzte izen emateak eta hilaren 26ra bitarte izango da horretarako aukera.
Astelehenean (hilak 15) zabalduko dute uztailerako antolatu dituzten Udaleko Irekietan izena emateko aukera, hala jakinarazi berri du udaleko Haur, Nerabe eta Gazteen Sailak. Hilaren 26a (ostirala) izango da apuntatzeko azken eguna.
Honakoak dira onartua izateko eta hautaketa prozesuan parte hartzeko baldintzak: 18 urte izatea eta euskara jakitea. Hautagai guztiek proba bat egin beharko dute eta hautaketa sistemaren irizpideen araberako merituak ere baloratuko zaizkie. Hautatuek oinarrizko prestakuntza ikastaro bat jasoko dute, udalekuetarako beharrezkoak izango dituzten programazio eredu, metodo pedagogiko eta bestelakoak ikasteko. Udalekuetan lan egiteko ikastaro honetan parte hartzea ezinbestekoa izango da. Ekainaren 7tik 8ra izango da ikastaro hori.
Informazio orriak eskuratzeko eta izena emateko webgune honetara jo beharko da (astelehenean aktibatuko dute esteka).
Hautaketa prozesuaren ondorioz sortuko den zerrenda beste egitarau edo behar batzuetarako erabili ahal izango dutela aurreratu dute.
