Euskal musikaren erreferenteak Pasaian izango dira
'Kontu Kantari, Pasaiako solasaldi musikatuak' izeneko zikloa irekiko dute Olatz eta Iñaki Salvadorrek igandean. "Belaunaldi ezberdinen arteko topagune" izan nahi du egitasmoak.
Igande honetan (hilak 21) egitasmo berezi bati emango diote hasiera Pasaian. Kontu Kantari, Pasaiako solasaldi musikatuak izeneko saioak abiatuko dituzte, lau igandetan eskainiko direnak. Barruti bakoitzak kontzertu bana jasoko du.
Udaleko Kultur zinegotzi Aitor Brionek aipatu du agintaldi planean jasotako helburuetako bati erantzuteko abiatu dutela egitasmoa: “Diziplina anitzeko kultur eskaintza programatuko genuela agindu genuen, eta horren isla da ekimen hau. Dinamika berri honen bidez, azken hamarkadetako euskal musikaren erreferenteetako asko Pasaiara etorriko dira, melomano zaleen eta sortzaileen gozamenerako formatu intimo eta berez batean”, esan du.
“Belaunaldi ezberdinen arteko topagune” izan nahi du egitasmoak, eta zinegotzia sinetsita dago emanaldiek arrakasta izango dutela: “Asmoa da datozen urteetan formatu horri jarraipena eman eta kontzertu gehiago antolatzea”.
Olatz eta Iñaki Salvadorrek irekiko dute musika zikloa igande honetan. 19:00etatik aurrera, San Pedroko Udal Aretoan, Familia artean emanaldia eskainiko dute. Irekiera saio hau “formatu intimo” batean egingo dutela aurreratu dute. Gainerako kontzertuak ezberdinak izango direla aurreratu dute, Olatz eta Iñaki Salvadorren saioa “bi artisten musika elkarrizketa biografiko moduko bat izango baita”.
Bigarren kontzertua Jurgi Ekiza musikari eta kantariak eskainiko du. Maiatzaren 26an (igandea da) izango da, ordu berean, Trintxerpeko alkateordetzan. Ekiza zuzenean bere bakarkako lana aurkeztuko du. Kontzertu honetan ber alderdirik pertsonalena aurkeztuko du Ekizak: “Lapurtarrak pasioz eta gozotasunez interpretatzen ditu abestiak, instrumentuentzako trebetasun berezia du, ahots pertsonala du eta oso ondo egokitzen da bere abestiek eskatzen dituzten tonu eta erregistroetara”, Brionen arabera.
Gari ezizenez ezaguna den Iñaki Igon Garitaonaindia izango da ziklo honen hirugarren protagonista. Gari: Bakarka izeneko emanaldia eskainiko du azaroaren 17an, 18:30ean, Pasai Donibaneko Juanba Berasategi aretoan. “Ziur nago bere ikuskizunean ez duela ahaztuko bere iragan musikalari egindako keinuren bat”, esan du zinegotziak.
Mikel eta Esti Markez aita-alabek itxiko dute Kontu Kantari zikloa, abenduaren 1ean (19:00etan), Antxoko Kultur Etxean. “Aita-alaben musika topaketa honek bi belaunaldiren testigantza ezberdinak oholtza berean entzuteko aukera emango digu, baita bi ikuspuntu ezberdin ere, baina batzuetan bat datozenak euskarazko musikaren egungo egoerari dagokionez”, aipatu du Brionek.
Igande honetarako sarrerak (eta gainerakoak) gaur (astelehena, hilak 15, 12:00etan) jarriko dira salgai, esteka honetan. Bestela, leihatilan bertan ere erosteko aukera izango da, kontzertuen egunean bertan.
