Sanjuandarrek bi bandera eskuratu dituzte Gipuzkoako Batel Txapelketan
San Juan Koxtapeko promesek, neskek eta mutilek, bandera bana irabazi dute asteburuko lehian. San Pedroko ontziak ere fin aritu dira.
Lehia izan da nagusi asteburu honetan Pasaiako Badian. Larunbatean Gipuzkoako Bate Ligako 12. eta azken jardunaldia jokatu zuten bertan, eta igandean berriz, Gipuzkoako Batel Txapelketa jokatu zuten. Bietan Pasaiako ordezkariak fin aritu dira.
Larunbateko lehian garaipen bakarra geratu zen Pasaian, neskek lortutakoa. Absolutuetan izan zen, San Juan Koxtape Gipuzkoako txapeldun izendatu zen. Absolutuan ere, San Juango mutilak garaipenetik oso gertu geratu ziren, B ontzia bigarren izan zen eta A ontzia, berriz, laugarren. Haien atzetik, bosgarren postuan, San Pedro sailkatu zen.
Jubeniletan, San Juan bosgarren izan zen nesketan eta mutiletan San Pedro A hirugarren, San Juan laugarren eta San Pedro B seigarren bukatu zuten estropada.
Infantil mutiletan San Pedro garaipenetik oso gertu izan zen, bigarren postua eskuratu baitzuen. Nesketan ere emaitza berbera errepikatu zen, San Pedroko A ontzia bigarren sailkatu baitzen. San Pedroko B ontzia, berriz, bosgarren izan zen.
Promesetan iritsi dira albiste onenak. Izan ere, San Juan A ontzia azkarrena izan zen, eta San Pedro A bigarrena. San Juango B ontzia laugarren izan zen, San PEdro B seigarren eta San Juan C zortzigarren. Nesketan, berriz, San Juan A bigarren izan zen, San Pedro B zortzigarren, Illunbe 17.en, San Pedro C 22.en, San Pedro A 23.en eta San Pedroko B ontzi mistoa 24.en.
Igandean, bi bandera etxean
Igandekoan, berriz, bi bandera herrian geratu ziren. Izan ere, San Juango promesetako mutilak eta neskak azkarrenak izan ziren, bandera bana eskuratuz (mutilen atzetik San Pedro izan zen azkarrena). Taldeak harrobia duela erakutsi du, promesetan San Juan Koxtape Gipuzkoako txapeldun izan baita bi bider.
Gainerako kategorietan ere izan dira albiste onak. Infantil mutiletan San Pedro bigarren izan zen Orioren atzetik; infantil nesketan San Pedro bigarren izan zen Mutrikuren atzetik; jubenil mutiletan San Pedrok txoko bat egin zuen podiumean (hirugarren postua lortuta), eta haien atzetik, laugarren postuan, Koxtapekoak sailkatu ziren; azkenik, absolutuan, San Pedroko mutilak hirugarren izan ziren.
