Zaintza sistema publikoa aldarrikatuko dute
Sanmarkosene eta Jesusen Bihotza egoitzetako egoera salatuko dute herri eragileek deitutako elkarretaratzean.
Sanmarkosene sarreran ostiralean egindako elkarretaratzearen irudi bat. Sanmarkosene eta Jesusen Bihotza adinekoen egoitzetako langileek, eta erabiltzaileen senideek egin duten erresidentzietako erradiografiak, hautsak harrotu ditu. Ez da gutxiagorako, kezkaz bizi dutelako salatu dutenaren arabera, bi egoitza horietan egunetik egunera ematen ari den baldintzen okertzea. Duela astebete egin zuten publiko egoera “jasanezina” zela, bai langileentzat, baita erabiltzaileentzat ere, eta hori erakusten duten hainbat datu ere zabaldu zituzten; besteak beste, erabiltzaileek afaltzen dutenetik gosaltzen duten arte 13 eta 15 ordu igaro daitezkeela, jaikitzen dituztenetik —07:30-08:00etan izaten da hori— 22:00ak arte, zenbait kasutan, erabiltzaile batzuek gurpildun aulkian eserita pasatzen dituztela ordu horiek guztiak, edota aldundiak ezarrita dituen asteko gutxieneko bi dutxak ere ez dizkietela egiten. “Erabiltzaileei eskaintzen zaien arreta oso urrun dago haiek dituzten beharretatik”, salatu dute.
Hori gutxi ez balitz, egun batzuetan janaria kartoizko plateretan eta plastikozko edalontzi eta mahai tresnekin zerbitzatu behar izaten dutela, garbitzailerik ez dagoelako ere azaldu dute. Janariaren kalitatea eta kantitatea ere, ezbaian eta kezka iturri, “sukalde zerbitzuetan kostu txikiko enpresak sartzearen ondorioz”.
Langileen lan karga gora, eta bitartekoak gero eta urriagoak, hobera egin beharrean, egunero-egunero okertzen doan egoera gailentzen den artean.
Horren aurrean, elkarretaratzera deitu dute herri eragileek. Zehazki, auzo elkarteek, Bilgune Feministak, Oreretako Mugimendu Feministak, Duintasuna Pentsiodunen elkarteak, erresidentzietako langileek, eta erabiltzaileen senideek deitu dute elkarretaratze hori ostiralean, 19:00etan, Zumardian.
Mozioa lantzeko eskaera
Egoeraren larritasuna gizarteratzeaz gain, alderdi politikoen agendan ere kokatu nahi dute. Hori horrela, aipatu herri eragileek mozioa aurkeztu dute Errenteriako Udalean alderdi politikoek aztertu dezaten eta babesa eman diezaioten. Bi erresidentzietako egoeraren berri bildu dute bertara eragileek eta eskaera zehatza egin alderdi politiko guztiei: “Herriko bi zaharren egoitzetan bizitzen ari diren egoera larriaren aurrean aldundiari berehalako konponbidea eman dezan eskatzeko galdegin nahi diegu alderdi politiko guztiei. Izan ere, aldundia da erresidentzien kudeaketaren azken arduraduna, eta egoeraren berri badu ere, axolagabe jokatzen ari da egoera larriaren aurrean”.
