Instagram bidez erabakiko dute gazteek madalenetako Gazte Guneko programa
Gazteek aukeratuko dute aurten ere uztailaren 24an Gazte Gunean izango de egitaraua.
Holi txupinazoa Gernika plazan artxiboko irudi batean. Gazteek erabakiko dute aurten ere, madalenen barruan hilaren 24an Gazte Gunean egingo duten egitaraua. Oraingoan, ordea, modu berezian eta beraiengandik gertuagoan egingo dute, izan ere, instagram bidez adostuko dute zer eta nola egin espazio horretan. Horretarako, botoak jasotzeko prozesua jarriko du martxan udalak instagram sare sozialaren bidez, eta gazteek bertan bozkatu beharko dituzte proposamenak beren gustuen arabera.
Parte hartzeko baldintzak, honakoak: 12-17 urte arteko errenteriarra izatea, eta Herri Biziaren Instagram kontua jarraitzea.
Hilaren 24an eta 25ean instagramen lehen inkestak publikatuko dituzte, musika, kirola eta tailerrak lehenetsita. Hala ere aukera egongo da diziplina horietatik kanpo dauden proposamen berriak egiteko. Hilaren 26an emaitzak argitaratuko dituzte instagram bidez horiek ere, eta horien arabera, proposamen zehatzagoak egingo ditu udalak hilaren 29ko astean.
Proposamen zehatzago horietatik abiatuta, berriz ere publikatuko dituzte instagram bidez azken inkesta eta galdera kutxa bat bukatzeko. Astez aste zehaztuko dira ekarpenak, egitaraua osatu arte.
Udalak iniziatibaren gaineko mezua zabaltzeko deia egin die Errenteria-Oreretako gazteei, “parte hartze ahalik eta zabalena bermatzeko”.
