Legez kanpo botatako hondakinak udalak jaso ditu
Eguzkik oroitarazi du udalei dagokiela legez kanpoko hondakindegiekin bukatzeko neurriak ezartzea, eta jarrera "proaktiboa" eskatu die.
107. poligonoan, hondakinak. Argazkia: Eguzki. Eguzkik martxoan salatu zuen Lezoko 107. industrialdean legez kanpo botatako hainbat hondakin azaldu zirela. Martxoaren 13an eman zion egoeraren berri udalari talde ekologistak, eta udal erakundeak azkar batean jaso zituen. “Geroztik, hondakinak erretiratzeaz gain, neurriak hartu ditu Lezoko Udalak legez kanpoko depositu berriak eragozteko, edo behintzat, zailtzeko”, azaldu dute Eguzkikoek.
Eguzkiren arabera, gero eta gehiago dira legez kanpo eta edonon botata agertzen diren hondakinak. Horien kontrolerako, udalen jarrera “proaktiboa” eskatu dute: “Udalek neurririk hartzen ez badute, egoera kroniko bihurtzen da, eta hasieran depositu solteak direnak denboraren poderioz zabortegi bihurtzen dira”. Donostiako Okendotegi bidea jarri dute horren adibide.
Eguzkik oroitarazi du edozein motako hondakinak behar ez den tokian uztea debekatua dagoela, eta baldin eta zer baldintzatan uzten diren horiek, arau-haustea ez ezik, delitu ere izan daitezkeela.
