Gau-jolasekin bueltatuko dira gazte olinpiadak
Biyurrieneak antolatutako Baga, Biga, Ligaren hirugarren jardunaldia jokatuko dute larunbatean. Zein izango ote dira gau-jolasak?
Aurreko jardunaldiko mendi-jolasetatik gau-jolasetara pasatuko dira larunbatean. Etzi —larunbata, hilak 20— Baga, Biga, Liga erdialdera iritsiko da. Hirugarren jardunaldia jokatuko dute, eta Biyurrienearen egitarauan agertzen den moduan, gau-jolasak izango dira. Fokuek Iturriozko skate parkea argituko duten bezala, olinpiar suak argituko du larunbat Tolarietako kantxa.
Antolakuntzan dabiltzanek gau-jolasen nolakotasuna ez dute argitu nahi izan, baina tokia eta ordua jakinarazi dute: 21:45ean, —esan bezala— Tolarietako kantxan. Hirugarren jardunaldiko probak misteriozko geruza baten azpian gorde badituzte ere, izpi moduko bi ohar aurreratu nahi izan dituzte.
Alde batetik, afalduta joateko deia egin diete parte-hartzaileei. Bestetik, espazio publikoak jolasetan bere tokia izango duela.
Talde bakoitzeko hiruna partaidek, gutxienez, hartu beharko dute parte larunbat gaueko jolasetan. Iraupenari dagokionez, pare bat ordukoa izango dela kalkulatu dute.
Hurrengo jardunaldiei dagokienez, maiatzaren 11n gastronomia kontuetan arituko dira. Ekainaren 8an izango da azkeneko eguna, ginkanarekin; Biyurrenearen Eskertza Eguna ere egingo dute orduan, sari banaketarekin batera.
