LABek ekintza egin du Alpha North Logisticsen, lan-baldintzak hobetzearen alde
Amazonen azpikontrata da; ezin ekintza sindikalik egin, eta ekintza egin du sindikatuak. Langileak garraiolariak direla aldarrikatu dute.
Amazonen azpikontrataren aurrean egin dute elkarretaratzea. Amazon enpresak Trapagaranen (Bizkaia) duen zentroan greba hasi dute bertako langileek, lan-baldintzak hobetzeko. Enpresak negoziazio-mahaia blokeatuta du, “hasieratik”, LAB sindikatuak salatu duenez. “Aldarrikapenen artean, Amazonek bere salgaien garraiorako dauzkan enpresa azpikontratatutakoen langileen lan-baldintzak egonkortzea eta enplegua bermatzea dago”, adierazi du LABek.
Horregatik guztiagatik, ekintza egin dute Oiartzunen, Alpha North Logisticsen. Amazonek azpikontratutako enpresekin egiten duela gogorarazi du sindikatuk. “Langile horien lan-baldintzak txarrak eta ezegonkorrak dira eta ez dute ekintza sindikalik egiteko aukerarik. Izan ere, langile horiek ekintza sindikala aktibatzen hasiz gero, egun batetik bestera kale gorrian uzten ditu AEBko multinazionalak”, azaldu dute.
Adibide parea jarri dute: Oiartzunen zeuden bi enpresetan, Kullawa Logistics eta Smart Delivery Routers-en, gertatutakoa. “Bigarren kasuan, gainera”, jarraitu dute, “Euskal Autonomia Erkidegoko Auzitegi Nagusiak pasa den abenduan kaleratu zuen epaiaren arabera, enpresak ez zuen arrazoirik langile guzti horiek kaleratzeko. Hori gutxi ez, bertan ari ziren langileak legez kontrako lagapenean ari ziren lanean”.
Lau eskaera
LABek salatu du azpikontratetan lan egiten duten langileen egoera “zaurgarria” dela. Oiartzungo lan zentroan ordezkaritza duenez, ekintza egin dute, lan-baldintzak borrokatzeko “aukerarik ez duten” horien izenean.
Amazoni lau eskaera helarazi dizkiote. Honakoak dira:
- Trapagarango zentroko hitzarmena jarrera onez negoziatzen hasi dadila.
- Azpikontratetako langileen lan-baldintzak duindu eta, subrogazioaren bidez, egonkortu ditzala.
- Banatzaileak Garraiolariak dira; ez mezulariak. Beraz, Gipuzkoako Salgaien garraioko Hitzarmen Kolektiboa aplikatu dezala.
- Amazon enpresak Lan Zentroko hitzarmena blokeatzen jarraitzen badu, LAB sindikatuak bere paketeen garraioa blokeatzen jarraituko du.
