Lan eta zaintza duinerako eskubidearen alde egitera deitu dute
Sanmarkosene eta Jesusen Bihotza adinekoen egoitzaren egoera "larriaren" harira bihar egingo duten elkarretaratzearekin bat egitera deitu du Oreretako Mugimendu Feministak.
Duela astebete salatu zuten Sanmarkoseneko eta Jesusen Bihotza adinekoen egoitzetako egoera. Bertako langileen baldintzak eta erabiltzaileek jasotzen duten arreta eskasa lehen lerroan jarri zituzten langileek beraiek eta erabiltzaileen senideek. Horren aurrean, herri eragileek batzarrera deitu deitu zuten eta dagoeneko berehalako konponbidea galdegiteko mobilizazioak egiten hasi dira.
Bihar bertan, elkarretaratzera deitu dute arratsaldean Zumardian; 19:00etan izango da eta auzo elkarteek, Oreretako Bilgune Feministak, Oreretako Mugimendu feministak, erresidentzietako langileek, erabiltzaileen senideek eta Duintasuna elkarteak dira deitzaileak.
Oreretako Mugimendu Feministak parte hartzera deitu ditu herritarrak, eta horretarako mezua zabaltzen ari da sare sozialen bidez: “Lan duina izateko eskubidea defendatuko dugu, bai eta erabiltzaileen bizitza duina izateko eskubidea ere. Beraien negozioa gure miseria da”. Biharko protestaz gain, Sanmarkoseneko langileak asteazkenero egiten ari diren elkarretaratzeekin bat egitera ere deitu du mugimendu feministak; Sanmarkoseneren egoitza aurrean egiten dituzte lan baldintza eta zaintza duinerako eskubidearen alde 10:45etik 11:30era.
