Etxegabetzea gelditu arte, tinko borrokan
Kaleratu nahi dituzten Eskalerillaseko bizilagunek herritarren babesa jaso dute gaur. Oarsoaldeko Etxebizitza Sindikatuak deituta, Elkartasun Eguna egiten ari dira.
Mobilizazioko irudi bat. Kale gorrian geratzeko arriskuan diren Trintxerpeko Eskalerillas blokeko bizilagunek pasaitarren elkartasuna eta babesa jaso dute gaur. Oarsoaldeko Etxebizitza Sindikatuak antolatuta, Elkartasun Eguna egin dute. Azken mobilizazioetan bezalaxe, dozenaka pasaitarrek bat egin dute gaurko aldarrikapen egunarekin.
Goizean abiatu dute Elkartasun Eguna. 11:00etan haurrentzako jolasak izan dira Gudarien plazan. Ondoren, kazerolada egin dute plazan bertan. Mobilizazioaren ondoren, bazkaria prestatu eta sabelak bete dituzte bertaratu diren 90 bat lagunek. Aldarrikapen eguna biribiltzeko, kantautore bat arratsaldea girotzen ariko da.
Otsailaren 5ean hasi zen bizilagunen amesgaiztoa. Orduan euren etxea betiko uzteko abisua eman zien Pasaiako Portuko Agintaritzak bertan bizi diren 12 familiei, ezustean harrapatu zituenak. Izan ere, Euskal Trenbide Sareak (ETS) proiektu bat abiaraztea erabaki du, zamen garraiorako trenbide bat eraikiko dute. Ondorioz, bizilagunen eraikina eraitsi beharko dutela jakinarazi zieten, eta lau hilabeteko epea eman zieten euren bizitokia uzteko, hortaz, ekainean utzi beharko dute.
Portuak, kaltetutako bizilagunei “beste bizileku bat emateko irtenbide bat bilatzeko” konpromisoa hartu badu ere, orain arte ez dute erantzunik jaso. Administrazio publiko guztien “erantzun eza” salatu dute gaurkoan: “Gaur egun 12 familia hauei ez portuak ez Jaurlaritzak eta ezta ere udalak ez digu eskaintzen inongo soluziorik, bakarrik kale gorrian geratzea, 60 urtez gure etxeak izan direnetatik kanporatuak izatea. Autoritate portuarioak ez du irtenbide alternatiborik begiratu nahi. Bere hasierako proposamenean mantentzen da, soinurik egin gabe ateratzen bagara etxeetatik ateratzeko epea luzatuko digu, baina berdin-berdin etxe gabe uzten gaitu”, esan dute eguerdiko mobilizazioan bizilagun batek eta sindikatuko kide batek. Biek Jaurlaritzak ere jaramonik egin ez diela deitoratu dute, eta Pasaiako Udalaren partetik “soilik barrura begirako hitz politak eta animoak” jaso dituztela, “hau da, kea. Bere herrian emango diren etxegabetzeen aurrean ezer ezin duela egin eta guk gure kabuz konpontzea, hori da finean esan diguna”.
Aukera bakarra “antolakuntza eta borroka” dutela erantsi dute. “Etxebizitza merkantzia bezala ulertzen duten enpresari eta politikarien aurrean, gure etxeetatik eta gure etorkizunagatik borrokan jarraituko dugu aterabide bat lortzen dugun arte, arazo hau guri egokitu zaigulako, baina edozeini gerta dakiokeen egoera bat da, krisi garaian sartuak gauden honetan”.
Horregatik guztiagatik, datorren ekainaren 1erako Oarsoaldeko Etxebizitza Sindikatuak antolatu duen manifestaziora joateko deialdia egin dute gaurkoan, “administrazioei erakusteko Eskalerillas borrokan dagoela etxebizitza aterabide bat lortu arte”. 12:00etan abiatuko da eta aurrerago jakinaraziko dute nondik.
Jarraian, HITZAk gaurko egunean jaso dituen irudiak:
