Pasaiako haurrak ere, itsas hondakinen kontrako borrokan
Pasaiako eta Gipuzkoako beste 7 udalerritako haurrek egindako kartelen erakusketa ibiltaria antolatu du Mater-ek. Maiatzaren 9an porturatuko da Pasaian.
Mater Ontzi Museo Ekoaktiboak euskal kostaldeko 8 herritako eskola zein irakaslerekin batera erakusketa berezi bat sortu du. Ibiltaria izango da, eta datorren astelehenean (hilak 22) uretaratuko da, Getaria izango da lehen portua. Pasaiako, Bilboko, Portugaleteko, Bermeoko, Ondarroako, Mutrikuko, Getariko eta Hondarribiko haurrek askotariko kartelak egin dituzte, mezuz jositakoak, eta guzti horiek jaso dituzte erakusketan. Zero Zabor Uretan kanpainaren barruan kokatu dute erakusketa. Kanpainak “hausnarketarako eta zaborren problematikari irtenbideak bilatzeko partaidetza prozesu bat” sortu nahi du, eta honetan, gizarteko hainbat eragile inplikatu dira, itsas zeharkaldi bat antolatuz, uztailean euskal kostalde osoan zehar ibiliko dena.
Zeharkaldi hori uztailean izango bada ere, Pasaiako eta aipatutako udalerrietako haurrak lanean hasi dira. Mezuz betetako kartelak egin dituzte, eta udalen laguntzarekin, ahalduntze hitzaldiak eskaini dizkiete. Hauetan, Mater-en bi erraldoien lankidetza izan dute, “gure gizarteak ikusi nahi ez duena ikustarazteko”: Bio eta Zabor. Bio, “izaki bizidunen sare magiko hori, bizitzeko beharrezko baldintzak eskaintzen dizkiguna, hari atxikia garena eta alde guztietatik espoliatuz eta kutsatuz hain gutxi zaintzen duguna”; eta Zabor “itsas hondakinen munstroa” da, “egunetik egunera handiagoa egiten dena sortzen dugun hondakin kantitate jasangaitzarengatik eta ezinbestea gure ingurumen, eta beraz, gure gorputzera iristen dena”.
Mater-en helburua Zabor txikitzea eta Bio handitzea da. “Ekintza bakoitzak balio du; gure ohiturekin eta eguneroko erosketarekin oso boto indartsua dugu nahi dugun etorkizuna posible egiteko, baina badirudi helduak garen aldetik kosta egiten zaigula ekintzara pasatzea eta gure erosotasun eremutik irtetea; horregatik, helduok jasaten dugun erosotasun autosuntsitzaile hori oraindik pairatzen ez duten haurrekin lan egiten dugu”, esan du Mater-eko kanpainaren arduradun Izaskun Suberbiolak.
Erakusketa maiatzean helduko da Pasaiako portura, Pasaia Itsas Festibalean hain zuzen. Maiatzaren 9tik 12ra izango da ikusgai.
