EH Bilduk inoizko emaitzarik onenak lortuta irabazi du Errenteria-Oreretan
Koalizio subiranistak 2019ko udal hauteskundeetan lortu zuen marka onena, eta hori gainditu du gaurkoan. Atzetik, EAJ eta PSE-EE, paretsu.
Herritarrak botoa ematen, eguerdian, Galtzarabordako kiroldegian. Errenteria-Oreretan EH Bilduk irabazi ditu hauteskundeak. Modu nabarmenean, gainera. Botoen %41,41 eskuratu ditu ezkerreko koalizio subiranistak.
Inoizko boto kopururik onena lortu dute. Duela lau urteko hauteskundeetan 5.236 boto lortu zituzten, eta gaurkoan ia bi mila boto gehiago izan dira hautetsontzietan jaso dutenak. EH Bilduk boto gehien jaso zuen zita 2019ko udal hauteskundeak izan ziren, eta langa hori gainditu du, ehun bozka inguruko aldeagatik.
Atzetik utzi ditu EAJ eta PSE-EE, hurrenez hurren. Bi alderdiek gora egin dute botoetan; jeltzaleek 34 botoko igoera izan dute, eta sozialistek, ia 600. Portzentajeetara eramanda, %21,85 eta %20,53 izan dira.
Laugarren geratu da PP. Emaitzak hobetu ditu, 2023ko hauteskunde lokal eta estatalen ildoari jarraituta. Duela lau urte 633 lortu zituzten, eta orain milako marka ozta-ozta pasatu dute.
Ezker konfederalak zatiketa sufritu du. 2020an 1.629 boto lortu zituzten, eta orain botoen laurdena galdu dute bien emaitza batzen bada. 745 jaso ditu Sumarrek, eta 482 Elkarrekin Podemosek (%4,37 eta %2,83).
Voxek emaitzak hobetu ditu, 170etik 278ra pasatuta.
Parte-hartzea %56,75ekoa izan da.
