Oiartzunen, hamar bototik zazpi EH Bildurentzat
Oiartzunen ez da sorpresarik izan, eta koalizioa garaile izan da, boto kopuruan nabarmen hazita. EAJ bigarren, botoren bat galduta.
Altzibarko hauteslekua, goizean. Oiartzunen ez da sorpresarik izan. Ingelesez esamolde bat bada: landslide victory, garaipen nabarmenak izendatzen dituena. Euskarara itzulita, lur-jauzi garaipena izan da EH Bilduk bere gotorlekuetako batean lortu duena.
Ia hamar bototik zazpi lortu du koalizioak, %68,08ko ehunekoa eskuratuta. 2020koekin alderatuta, dozena erdi puntu hobetu ditu, baina botoetan izan da gorakada nabarmena: 628 papertxo gehiago lortu dituzte.
Atzetik EAJ geratu da. 1.134 herritarrek aukeratu dute jeltzaleen papera, duela lau urte (pandemia betean) baino ehun boto gutxiago; %21,78 izan da ehunekoa. Hirugarren alderdi sozialista izan da, emaitza esanguratsurik lortu gabe: 192 boto jaso dituzte, aurreko zitan baino 26 gehiago.
Ezker konfederalak 240 lortu zituen 2020an, eta orain horrela banatu dira: 97 jaso ditu Sumarrek, eta 91 Elkarrekin Podemosek. PPk baino boto gehiago jaso dituzte hala ere, ohikoa ez dena. 84 jaso dituzte eskuindarrek. Urruti geratu da VOX, 30 botorekin.
