Egitarau oparoarekin dator San Marko eguneko erromeria
Herriko eragileek elkarlanean antolatu dute egun osoko egitaraua. Gaur aurkeztu dute eta herritarrak parte hartzera deitu dituzte.
Sazn Marko Eguneko erromeria aurkeztu dute. San Marko eguna ospatuko dute datorren igandean Bizarain mendian, San Marko gotorlekuaren inguruan, eta gaur aurkeztu dute ondu duten egitarau zabala. Egun osoko erromeria izango da, musika, kirol probak, herri kirolak, azoka eta dantzaldia ere izango dira bertaratzen direnen gozagarri.
Udalak eragileekin elkarlanean antolatu du eguna, eta gaur eman dute egitarauaren berri sare horretan elkarlanean ari diren eragileak: Beti Prest elkartea, Errenteria Atletismo Taldea CAR, Doike Musika eta Dantza Kultur Elkartea, Herri Arte Eskolako trikitixa eta dultzaina taldea, herriko trikitilariak, Udal Txistulari Taldea, Xenpelar Bertso Eskola eta Zamalbideko Auzo Elkartea.
Igandekoa “egun parte hartzaile eta herrikoia” izatea nahi dutela esan dute antolatzaileek, “horretarako elkarteok urtean zehar antolatzen ditugun jarduerei lekua ematea izan da programazioaren ardatz nagusietariko bat”. Ekitaldi andana, baita bertako produktuen azoka ere: “Jaki postuak jarriko dituzte gotorlekuaren kanpoaldean eta barrualdean ere, eta bestelako artisautza produktuak ere izango dira”.
Bertaratzen direnentzat jateko eta edateko kantina izango dute, Zamalbideko Auzo Elkarteak jarritakoa. Eta eguraldiak lagunduko ez balu, berriz, gotorlekuak hartuko du egitaraua.
Autobus zerbitzua
San Marko erromeriara joateko autobus zerbitzu berezia jarriko dute martxan hilaren 28an, Morrongilleta kaleko geltokitik abiatuko dena. Herrigunetik irteerak 10:00etatik 13:40era 20 minutuero izango dira; 16:00etatik 18:40era, 40 minutuero.
San Marko gotorlekutik, berriz 10:20etik 14:00etara, 20 minutuero; 16:20etik 19:00etara, 40 minutuero.
Erromeriarako antolatutako egitarauaz gain, bisitariek Aizpitarte bidegurutzean erakusketa ikusteko eta gotorlekuan bertan egiten diren bisita gidatuak egiteko aukera izango dute, aldez aurretik izena emanda. Horretarako posta elektronikora mezua bidali, edo 943 44 96 38 telefono zenbakira deitu beharko dute.
- 10:30: Erromeria martxa San Markora Foru Plazatik abiatuta herriko trikitilarien eskutik.
- 11:00: San Marko igoeraren helmugaratzeak CAR elkartearen eskutik
- 1:30 Herri kirolak
- 13:00: Bertso Saioa Xenpelar Bertso eskolaren eskutik
- 14:30: Haur jolasak
- 16:00: Dantzaldia Udal Txistulari Taldearen eskutik
- 116:30: Txokolatada Zamalbide auzo elkarteak eskainia
- 17:00: Muxikoak Beti Prest taldearen eskutik
