Hibaikako Neska Gazteak Euskadiko Batel Txapelketan hirugarren
Asteburuan jokatu dute Euskadiko Batel txapelketa Pasaiako badian. Hibaikako gazte mailako bi ontzien lan ona; mutilak kontsolazio txandako onenak izan ziren.
Hibaikako Neska Gazteak, oholtza gainean domina jasotzeko unean. Argazkia: Liher Saiz Euskadiko Batel Txapelketa jokatu zuten asteburuan Pasaiako Badian. Hibaikaren bost ontzik hartu zuten parte kanporaketa estropadan, larunbatean —Haur neskak, haur mutilak, kadete neskak, gazte neskak, eta gazte mutilak— eta horietatik hiru ontzi heldu ziren atzo jokatutako kanporaketara. Hibaikako Neska Gazteek hirugarren postua egin zuten eta brontzea zintzilikatu lepotik Euskadikoan podiuma eginda. Tolosaldea eta Hernaniren atzetik sailkatu ziren errenteriarrak. Lan bikaina atzokoan Malen Irurtzun, Irati Rodriguez, Elene Telletxea, Amaiur Gartzia eta Izaro Prieto Lemazainak osatutako eskifaiarena.
Hibaikaren Mutil Gazteen ontzia atzoko finalean. Argazkia: Dani Novas
Mutil Gazteek kontsolazio txandako denborarik onena egin zuten atzokoan. Hasi eta buka lehenengo postuan aritu ziren estropada osoan errenteriakoak, pena aurreko egunean ez zutela lortu ohorezkoan sartzerik. Hala ere, bikain, Ander Plata, Aitor Legorburu, Anxo Murua, Oier Gallastegi eta Nerea Curto lemazainak osatutako eskifaia. Maila polita erakutsi dute Gipuzkoako Batel Liga osoan zehar gazte mailako bi ontziek, baita Euskadiko Txapelketan ere.
Kadete neskak ere heldu ziren atzoko finalera, horiek ere kontsolazio txandan aritu ziren. Ganix Tarragona, Gift Oviasogie, Intza Ayala, Iraia Blanco eta Edurne Martin lemazainak osatutako ontzia laugarren sailkatu zen euren txandan, Ondarroa, Tolosaldea eta Zumaiaren ondotik.
Atzoko txapelketaren denborak hemen klik eginda kontsulta daitezke, eta estropada, berriz, lotura honetan sartuta ikus daiteke osorik.
