Kultura eta musiken "Artxipelagoa" bihurtuta
Irailaren 19tik 22ra egingo dute Atlantikaldiaren 11. ekitaldia "Artxipelagoa" lelopean. Gaur irudia eta leloa aurkeztu dituzte.
Atlantikaldiaren aurkezpena egin dute gaur. Artxipelagoa. Hori izango da Atlantikaldiaren aurtengo leloa. Gaur aurkeztu dute, baita haren irudia izango dena, eta irailaren 19tik 22ra ospatuko dela ere. 11. ekitaldia izango da honakoa, eta hortik aukeratu duten leloa, Aizpea Otaegi alkateak azaldu duen bezala, “11 urte beteko ditu aurten jaialdiak eta hamaika hitzaren esanahia zenbaki hutsetik harago doa euskaraz. Hamaika aniztasuna da, eta hain justu, hori da Atlantikaldiaren erroa. Hamaika emanaldi, hamaika sorkuntza, hamaika harreman, hamaika emozio… guztiak kopuruan ezberdin, baita tamainan ere. Gure unibertsora eramatean, Artxipelago bat datorkigu burura: irla txiki ezberdinez osatutako eremu bat”.
Aurten ere nabarmen jarri dituzte Atlantikaldiaren barruan “berezienetakoak” diren Itsas elkarrizketak, “kultura ezberdinetako sortzaileen arteko elkarlanak”. Horren adibide da urtero jaialdiaren kartela. Hori egiteko, munduko txoko ezberdinetako artistak elkartzen dituzte. Aurten ere hala izan da, eta irudia, Ibane Cerezo urretxuarrak eta Porto (Portugal) Catarina Alvesek egin dute elkarlanean.
Bi artistek esan dute bien arteko lankidetza proiektu “aberasgarria” izan dela. “Modu bikaina da kultura eta perspektiba ezberdinen arteko zubiak eraikitzeko eta sormen kolektiboa bultzatzeko”, gaineratu du alkateak.
Lehen agerraldi honetan datak, irudia eta leloa aurkeztearekin batera Kultur topagunearen eta musika jaialdiaren ezinbesteko ezaugarri den parte hartzeari ere egin diote tartea. Izan ere, aurten ere, programazio artistikoa herritik bertatik sortutako proposamenekin osatu nahi dute. Eragileek galdetegi bat dute horretarako eskura (egin klik hemen) eta hura beteta proposamenak bidal ditzakete maiatzaren 16ra arte.
Maite Gartzia Kultura zinegotziak proposamenak baloratzeko garaian antolakuntza batzordeak izango dituen irizpideak argitu ditu: urtean zehar antolatutako ohiko ekitaldien errepikapena ez izatea, “hau da berrikuntzaren bat barneratzea”; herritarren parte hartzea sustatzea; eragile ezberdinen arteko elkarlanetik sortutako iniziatiba izatea; eta kultur aniztasuna bultzatzea.
