Besaide taldeak joko du Soinuenearen Udaberriko Kontzertuan
Datorren larunbat arratsaldean izango da urtaroko kontzertua. Goizean, albokari buruzko jardunaldia, kale-buelta eta bazkaria.
Gorka Bravo, Teresa Jareño eta Aritz Mugartegi. Soinueneak urtaro bakoitzean herri musika ardatz duen kontzertua antolatzen du. Udaberrikoa —oraindik ez badirudi ere— datorren larunbatean (hilak 27) izango da, eta Besaide taldea gonbidatuko dute.
Euskal Herriko herri musikaren erritmo, doinu eta kopla zaharren inguruan bildu dira Aritz Mugartegi gernikarra, Teresa Jareño gipuzkoarra eta Gorka Bravo arabarra.
Taldeak Besaide izena du hiru lurraldeak elkartzen diren puntua delako. Gainera, larunbaterako, Iraide Ansorena perkusionista batuko zaie.
Lehendik zeuden gaiak berrinterpretatzen dituzte eta berriak sortzen dituzte tokiko eta urrutiagoko soinu-tresna herrikoiekin: zarrabetea, alboka, buzukia, klarinetea, baglama…
Kontzertua 19:00etan hasiko da, eta 8 euroko prezioa dute. Leihatilan eros daitezke egunean bertan, edo lehenago, online.
Goizean, ekitaldi gehiago
Besaide taldeak alboka erabiltzen du bere kontzertuetan, eta instrumentu horri buruzko ikastaroa egingo dute goizean, beste pare bat ekitaldirekin batera. Soinueneak Albokazale Bilgunearekin batera antolatu du jardunaldia.
- 10.00etatik 12.45era: Fiten lenguetak egiteko ikastaroa Ibargain Elkartean (18-20 euro).
- 13.00etan: Kalebuelta Oiartzungo Herri Musika Eskolako Biolin taldearekin batera.
- 14.00etan: Bazkaria Oiartzungo Ibargain Elkartean.
