Trafiko mozketak izango dira Donibanen larunbatean
Udaberri Festak eta Bidasoa Itzuliak eragina izango dute barrutiko sarrera eta irteeretan, egun osoz.
Larunbat honetan (hilak 27) Pasai Donibanen trafiko mozketak izango direla jakinarazi du Pasaiako Udalak. Zenbait kirol eta kultur ekitaldi izango direnez, bide batzuk moztuko dituzte.
Udaberri Festa egingo dute Meipi inguruan, eta ondorioz, Lezobidea kalea moztuko dute, 10:00etatik igandeko 01:00ak arte. Hortaz, Donibane kalera eta Bizkaia plazara joateko, Larrabide errepidetik eta San Roka eta Juan XXIII kaleetatik sartu beharko dira autoak. Irteera, berriz, Bordalaborda kaletik izango da. Autobusek Meipiko biribilgunean emango dute buelta, zerbitzua bukatu arte.
Arratsaldean, berriz, Bidasoa Itzulia Pasaiatik pasako da, eta ondorioz, Donibaneko irteera itxiko dute 16:45etik 18:15era, lasterketa Jaizkibelera igotzeko bidegurutzetik pasako baita. Horri lotuta, gogorarazi dute Jaizkibelerako sarbidea itxita egongo dela trafikoarentzat.
Garraio publikoa erabiltzeko gomendioa eman du udalak. Informazio gehiago jasotzeko, 943 00 43 00 telefono zenbakira hots egin daiteke.
