Itxura berrituarekin dator maiatzeko Oiartzungo agenda
Oiartzungo kultur agendaren itxura aldatu dute herriko ekintza guztiei leku egiteko asmoz. Maiatzean, orotara, 84 ekintza izango dira.
Esku orri berria. Itxura aldatu diote Oiartzungo herriko kultur agendari, ekintza denei toki egiteko asmoarekin. Udalak adierazi duenez hilabetez hilabete handituz doa oiartzuarrentzat antolatzen dituzten aisialditako proposamen kopurua, eta azken boladan nekez kabitzen ziren ekintza guztiak etxez etxe banatzen duten agendan.
Maiatza berrikuntzen hilabetea dela esan daiteke, batetik esku orriaren diseinua aldatu dutelako, eta bestetik inoiz baino hitzordu gehiago antolatu dituztelako; 84, hain zuzen.
Betiko moduan, Arraguako festak emango diote hasiera auzoetako jaien birari. Aurtengoan ere 6 eguneko egitaraua antolatu dute, baina maiatzeko gainontzeko egunetan ere hamaika ekintza egongo dira: ikasturte bukaerako festak, kontzertuak, kirol saioak, ibilaldiak, bertso saioak, hitzaldiak…
Maiatzeko ekitaldien egitaraua ikus daiteke hemen klik eginda.
