Goizeko sagardo festari jarraipena eman diote arratsaldean
Zientoka herritar gerturatu dira Linoko karpara. 40 sagardogileren zukua dastatzeko aukera izan dute.
Goizeko kalejirarekin motorrak berotu ondoren, arratsaldean Linoko karpara bertaratu dira zientoka herritar XXXVI. Sagardo Egunari jarraipena emateko. Hasiera batean Zumardian izan behar zuen festak, baina azkenean, eguraldi txarrarekin aurreikusita zegoen moduan, Linoko karpara lekualdatu dute. 40 sagardogileren zukua dastatzeko aukera izan dute heldu zein gazteek, baita Eusko Label pintxoak, mota askotako gozoak eta txistorraz, hirugiharrez, txokolatez edo gaztaz betetako taloak probatzeko ere. Eguerdian ez bezala, arratsalderako eguraldia lagun izan dute, eta errenteriarrak zein eskualdeko bizilagunak gustura aritu dira.
Aurtengo edizioa, gainera, berezia izaten ari da, antolatzaileek Palestinari keinu bat egin nahi izan diotelako. “Oreretako Sagardo Eguna elkartasuna adierazteko unea ere bada, eta genozidioa pairatzen ari den Palestina izan nahi dugu gogoan. Gozatzeko aukera egongo da, baina gogoan izan beste batzuk sufritzen adi direla” adierazi zuten aurkezpenean.
Hona hemen arratsaldeko zenbait argazki:
