[Irudiekin] Giro bikaina Gurutzen hasi eta bukatu den Bizardiaren ibilaldian
Adin-tarte oso zabaleko 188 lagunek hartu dute parte Bizardiaren 43. ibilaldian. Ustekabeko bat gaindituta, dena bikain joan da.
Eguraldi zoragarria izan zuten bidelagun. Bizardia elkartearen mendi taldeak urteroko tradizioa berritu zuen atzo: XLIII. Ibilaldia egin zuten, eguraldi eta giro paregabearekin. Aurtengoan, estreinakoz, Gurutzen hasi da ibilaldia, eta toki berean —hau ohikoa da— bukatu.
Asebeteta egin dute balorazioa Bizardiakoek: “Datorren urtean oso zaila izango dela aurtengo arrakasta gainditzea. Baina, gogo berrituta, saiatuko gara”. Gurutzeko elkartekoek jakinarazi dutenez, 188 lagunek erabaki zuten ibilaldia egitea; horietatik 88 izan ziren emakumeak, eta ehun, gizonezkoak. “Azpimarratzekoa da”,jarraitu dute, “parte hartu duten 14 urtetik beherako zazpi umeak, txikiena Aner Elizondo izan dela, 12 urtekoa”. 70 urteen langa aspaldi utzi zuten mendizaleen kopurua ez zen txikia izan.
Bizardiak jakinarazi duenez, azkarrenek lau ordu baino gutxiago behar izan zuten martxa burutzeko, baina gehienek bost ordu inguruan egin zuten. Gehiago behar izan zuenik ere izan zen: “Dezente izan ziren sei ordutan iritsi ziren. Bikote batek ere lasai asko hartzea erabaki zuen eta atera eta zazpi ordu geroago elkartean agertu zen”. Guztiek bere saria izan zuten elkartera iristean: tragoak eta pintxoak.
Ustekabekoa margoarekin
Gurutzen bertan hasi zen ibilaldia, eta antolatzaileek zein parte-hartzaileek horren balorazio positiboa egin zuten. Ibilbidean plastikoa ez erabiltzeagatik, denborarekin desagertzen den margo bat erabili zuten.
Hala ere, nahi baino lehen ezabatu ziren. Izan ere, bidea markatzera joan ziren bezperan, baina euriak egindako markak ezabatu zituen. Igande goizean, antolakuntzako bi kide lehenago atera ziren, berriro markatzera. Ustekabeko hori kenduta, dena bikain joan zen.
Oiartzungo udaltzainei eskerrak eman zizkieten, ibilaldia egiten zutenak errepidetik joan behar izan zuten aldian laguntza eman zietelako. Lanean aritu ziren boluntarioei ere eskerrak eman dizkiete, baita mendi festan parte hartu zuten guztiei ere.
