Odolkiak ordainetan Oiartzuni, Burgosen
Neskek lehen zati bikaina jokatu du bigarren sailkatuarenean, golik sartu gabe. Mutilek ere galdu egin dute. Areto futbolean, kale eta bale.
Igande arratsaldean jokatu zuten Burgosen. Odolkia da Burgoseko produktu ezagunenetako bat, eta —esaera zaharrak dioen moduan— horrekin ordainarazi zieten oiartzuarrei Gaztelako hirian.
Oiartzungo neskek bigarren sailkatuaren kantxari bisita egin zioten atzo arratsaldean, eta lehen zati paregabea jokatu zuten. Hiru aukera sortu zituzten oiartzuarrek, baina baloiak ez zuen marrarik gainditu. Egindako akats horiek odolkitan ordainarazi zieten etxekoek.
Bigarren zatia burgostarrena izan zen, eta beraiena izan zen aukerak sortzeko ekimena. Horietako bitan, erdiraketadun jokaldietan, lortu zituzten bi gol bakarrak. Oiartzuarrek ez dute lehenengo zatiko emaririk izan, eta ez ziren aukerak sortzeko gai izan. Laugarren jarraitzen dute sailkapenean.
Mutilen taldeak Zumaiakoren bisita jaso zuen Ugaldetxon. Ongi atera ziren kantxara, baina ez zuten punteria finik izan. Kostaldekoek bai, ordea, eta horrela aurreratu ziren.
Oiartzuarren maila jaitsi zen, eta zumaiarrek bigarrena sartzea lortu zuten. Aldea murriztu zuten Karla Lekuonako egoiliarrek, baina partidak ez zuen gehiagorako eman. Porrota, beraz.
Areto futbolean, aurkia eta ifrentzua
Ostiral gauean jokatu zuten Oarsoaldeko derbia.
Lehenengo Mailan, Oiartzunek Oarsoaldeko derbia zuen Afantxoren kantxan. Partida ederra jokatu zuten oiartzuarrek, eta hamargarren minuturako aurreratu ziren. Bi minutu iraun zuen pozak, ordea.
Ez zuten bururik makurtu, eta aldageletara joan aurretik beste bi gol sartu zituzten. Bigarren zatian partida berdindua joan zen. Azken lau minutuetan Oiartzunek bi gol sartu zituen 1 eta 5eko emaitzarekin bukatu zen derbia.
Lider berriak dira oiartzuarrak, Lauburuk bere partida galdu baitzuen, Lezon, Gaintxuren kontra. Liga bukatzeko bi jardunaldi falta direnean, pauso erraldoia eman dute oiartzuarrek.
Miren Tabernak, berriz, bigarren sailkatuaren bisita jaso zuen Elorsoron. Ttakun aurreratu zen, bi gol sartuta, eta atsedenaldira iritsi baino lehenago aldea murriztea lortu zuten etxekoek.
Bigarren zatian aukera asko izan arren, ez zen golik izan eta 1-2ko emaitzarekin bukatu zen partida. Ttakunek Miren Taberna harrapatu du lidertzan, eta azkoitiarrak dira lehen postuaren jabe.
Emakumeen 3. RFEF Maila
- Burgos — Oiartzun: 2-0.
Gizonezkoen Ohorezko Erregional Maila
- Oiartzun — Zumaiako: 1-2.
Emakumeen Euskal Liga
- Lakua — Oiartzun B: 1-3.
Gizonen Lehen Erregionala. Kopa M-1.
- Oiartzun B — San Marcial: 5-1.
Emakumeen Ohorezko Erregional Maila
- Oiartzun C — Lagun Onak: 0-6.
Mutilen Gazte Mailako Euskal Liga
- Deustu — Oiartzun: 5-0.
Mutilen Gazte Mailako Gorengo Maila
- Urnieta — Oiartzun B: 1-3.
Mutilen Gazte Mailako Lehen Maila. Kopa M-1.
- Amara Berri — Oiartzun C: 2-2.
ARETO FUTBOLA
Gizonen Gipuzkoako Lehen Maila
- Afantxo — Oiartzun: 1-5.
Gizonen Gipuzkoako Bigarren Maila
- Miren Taberna — Ttakun: 1-2.
