Nazioarteko Itsaspeko Zinema Zikloaren 11. edizioa aurkeztu dute
22 film labur, diaporama bat eta 4 dokumental eskaintzeaz gain, Xenpelar aretoan ere erakusketa bat egongo da ikusgai gaurtik aurrera.
Ostegunean emango diote hasiera CIMASUB Nazioarteko Itsaspeko Zinema Zikloaren 11. edizioari. Itsaspeko paisaiak ditu ardatz zikloak, eta maiatzaren 2an, 8an eta 15ean, 19:00etan Niessen Kulturgunean 22 film labur, diaporama bat eta 4 dokumental eskainiko dituzte.
Subacuáticas Real Sociedad Elkarteak eta Aquariumak antolatu dute zikloa Errenteriako Udalaren babesarekin, eta prentsaurrekoan azaldu dutenez, aurten, Indonesia izango da protagonista. Ekitaldi eta emanaldi guztiak doakoak izango dira, eta ziklora bertaratzen diren ikusleen artean bi pertsonentzako ontzi irteera bat zozkatuko dute.
‘Etorkizun urdina eraikitzen’ esloganarekin, CIMASUBek ozeanoarekiko eta haren jasangarritasunarekiko konpromisoaren funtsa transmititzen dituela azaldu dute, eta Real Sociedad itsaspeko elkartetik helarazi dute itsaspeko zinemaren erakusketak gizateriaren eta ozeanoen arteko elkarrekintzari buruz hausnartzeko aukera bat ematen duela.
Horretaz guztiaz gain, Txikizikloa ere antolatu dute, Lehen Hezkuntzako 5. eta 6. mailako ikasleei zuzendutako ekimena. Maiatzaren 2an izango da, 10:00etan.
Xenpelar aretoan, erakusketa
Proiekzioez gain, gaurtik maiatzaren 12ra -astelehenetik larunbatera, 17:00etatik 20:00etara- Xenpelar aretoan argazki erakusketa bat egongo da ikusgai, itsas hondoko misterioak eta gizakiak naturarekin duen harremana ikusteko aukera ematen duena. Erakusketa horretan “espezie bitxi eta deigarrienetara eta naturaren edertasunera” hurbiltzen dituzten argazkiak izango dituzte ikusgai.
Jaizkibel-Capbreton, itsasgune babes berria
2023ko abenduaren amaieran BOEn argitaratu zuten Itsas Natura 2000 Sareko Garrantzi Komunitarioko Lekuen zerrendan sei itsas gune babestu berri sartzeko proposamena onartu zuen ministro agindua, eta, hain zuzen, horietako bat Jaizkibel eta Ulia mendien eta Capbreton itsaspeko arroilaren artean dagoena da, 1.525 kilometro koadroko itsas eremua duena.
Jaizkibel-Capbretongo itsas inguruneek urpean -edo erdi urpean- dauden itsas arrezife eta haitzuloetako komunitate bereizgarri ugari biltzen ditu, eta eremu hori kontserbaziorako garrantzi handiko nazioarteko korridore ekologikoa da.
