Oiarperen asteburuko partiden emaitzak (2024-04-29)
Oiartzungo klubeko pilotariek 29 partida jokatu dituzte asteburuan, eta horien ia erdian nagusitu dira. Oihan Etxeberria, finalera Ajangizen.
Oiarpeko pilotariek 29 partida jokatu dituzte asteburuan. Horien ia erdia irabazi dute, hamalau garaipen poltsikoratu baitituzte.
Partida gehien-gehienak lehen fasekoak izan dira, bat izan ezik. Oihan Etxeberria oiartzuarrak Oberenako Apeztegiarekin batera osatzen du bikotea Ajangizko txapelketan, eta finalerdiko partida jokatu zuten Okamika eta Sotilen kontra. Konexio oiartzuar-nafarrak ongi funtzionatu zuen beste behin, eta finalerako txartela lortu zuten, sei tantoko aldeagatik irabazita.
Etxeberriak berak beste partida bat jokatuko du bihar arratsaldean, Bergara Hiria Txapelketan. Kasu horretan ere, Apeztegiarekin osatuko du bikotea. Aurrez aurre, gainera, edukiko du Unax Landa klubeko kidea, Lagun Onak-eko Bullonekin bikotea osatzen. Irabazten dutenak txapelketako finalerdietara pasatuko dira.
