Udal txistulari taldeak 4 kontzertu emango ditu maiatzean
Iztieta, Olibet, Ugarritze, Igantza eta Galtzarabordan izango dira diana doinuak besteak beste, maiatzeko igandeetan.
Errenteriako udal txistulari taldeak maiatzean zehar lau emanaldi egingo dituela iragarri dute: lehena maiatzaren 5ean izango da, eta azkena, berriz, hilaren 26an.
Igande honetan emango diote hasiera emanaldi sailari, eta Iztieta, Olibet eta Ugarritze auzoetan zehar ibiliko dira udal txistulariak 09:00etan hasita. Ohi bezala, udaletxean amaituko da emanaldia.
Bigarren hitzordua 12an, hilaren bigarren igandean izango da, eta kasu honetan Galtzaraborda eta Igantzi auzoak alaituko dituzte diana doinuekin. 09:00etan hasiko da ibilbidea oraingoan ere, eta udaletxean amaituko da berau.
Hirugarren hitzordua, aldiz, ezberdina izango da, Udal Txistulari Taldeak Musikasteko 52.edizioan ere lekua izango baitu. Hilaren 19an Ereintza dantza taldearen laguntzarekin txistulari taldeak ohiko emanaldia emango du, 12:00etatik aurrera, udaletxeko arkupetan.
Maiatzeko kontzertuei hilaren 26an emango diote amaiera, eta 09:00etatik hasita erdiguneko kaleak alaitzen ibiliko dira txistulariak. Udaletxean amaituko dute.
