Xanistebanetako kartel lehiaketa, martxan
Maiatzaren 31ra arte aurkez daitezke lanak, udaletxean. Bost lan onenentzako saria egongo da, eta festetan erakusketa egingo dute.
37 lan aurkeztu ziren iaz, 25 helduenak eta 12 gaztetxoenak. 2024ko xanistebanak iragartzeko lehiaketa martxan jarri duela jakinarazi du Oiartzungo Udalak. maiatzaren 31ra arte aurkeztu ahal izango dira lanak, Oiartzungo udaletxearen informazio bulegoan.
Xanistebanetako Jai Batzordeko kideak izango dira lan onenak aukeratuko dituztenak. Aurkeztuko diren kartel guztiekin erakusketa egingo dute xanistebanetan.
Bost sari
Teknika librea erabili daitekeela gogorarazi du udalak, baldintzen berri ematerakoan. Kartelaren neurria 70×50 zentimetrokoa izango da eta Xanistebanak 2024 agertu beharko du. Genero-berdintasunaren irizpidearen zainketa ere kontuan hartuko du epaimahaiak.
Jakinarazi dutenez, bost lan onenek izango dute saria. Lau dirutan izango dira eta bat formakuntza beka gisa. Horrela banatuko dira: irabazlea (600 euro); oiartzuar onena (300 euro); bi akzesit (bakoitza 50 eurokoa) eta Ehuntze Sormen Espazioan urtebeteko matrikula.
