Bihar zabalduko da Herri Arte Eskolan izena emateko epea
Ikasturte berriarekin batera, hainbat berrikuntza aurkeztu ditu Herri Arte Eskolak; hala nola idazketa sortzailea, podcasta edo gidoigintza.
Herri Arte Eskolak bihar irekiko du 2024/25 ikasturterako matrikulazio epea, eta datorren ikasturteari so eginez, diziplina artistiko ezberdinetan espezialitate berriak zabaldu dituzte; hala nola idazketa sortzailea, podcasta, rap-spoken-word, gidoigintza, argazki eta bideogintza eta marrazketa, besteak beste. Oro har, 50 aukera baino gehiago prestatu dituzte esperientzia berriak partekatzeko asmoarekin.
Aurreko urteetan izandako arrakasta dela eta, Hastapen Artistiko Multidiziplinarraren eskaintza mantenduko dute 4-7 urte arteko gaztetxoentzat, eta, horretaz gain, Errenteriako hainbat ikastetxetan bi diziplina landuko dituzte jangela orduetan. LH3 – 6 arteko ikasleentzat izango da, eta horren helburua arratsaldeetako saioetara joan ezin daitezkeenei laguntzea da. Antolatzaileek ohartarazi dute, bestalde, jangelako eskoletara zein arratsaldeko eskoletara joan nahi duenak matrikula bakarra ordaindu beharko duela. Izen emateak ikastetxean bertan egin beharko dira.
Helduentzat ere badago eskaintza
Ikasturte berriarekin batera, bide berriak zabalduko dituzte Herri Arte Eskolakoak, eta, esaterako, ikusle/entzule eskolak emango dituzte. Eskola horren helburua da artea ikuslearen profiletik bizitzea, eta diziplina bakoitzarekin sei saio egingo dituzte. Lehen bost saioetan diziplina bat landuko dute, eta seigarren saioan irteera egingo dute prestaketa saioetan landu duten gaiarekin harremana duen leku batera. Irakasleen ustez, aurre-ezagutza jakin batekin irteera egitean gehiago ikasteko aukera izango dute ikasleek. 18 urtetik gorakoentzat izango dira saio horiek, eta astean behin izango dira.
Bihartik maiatzaren 12ra plaza eskaera egiteko epea zabalduko da, eta bigarren fasean, ekainaren 1etik 9ra izango dena, matrikula baieztatu beharko dute eskatzaileek. Eskaerak egin ondoren ordutegiak aldatzeko aukerak izango da, eta ekainaren lehenetik bederatzira eskatzaileek posta elektroniko bat jasoko dute Inika plataformaren bidez matrikula onartzeko aukerarekin.
Kuotak, herritarrei egokituta
Oraingoan ere herritarren ahalmen ekonomikoari egokitutako kuotak izango dira, eta kuoten egokitzapenaren eskaera baliozkoa izan dadin, matrikula onartzen denean egin beharko da. Informazio gehiago udalaren webgunean edo eskolaren webgunean aurki daiteke.
