Karmengo Ama haur eskolako patioa "atseginagoa eta estimulatzaileagoa" izango da
"Naturarekin harremana handitu eta bero boladen ondorioak gutxitzeko" asmoz, patioa berdetu eta naturalizatuko dute. Ostegunean hasiko dira lanekin.
Gaur egun, horrela dago patioa. Karmengo Ama haur eskolako patioa berdetu eta naturalizatzeko lanak hasiko dituzte ostegunean (maiatzak 2). Lau hauekin eskola “leku atseginagoa eta estimulatzaileagoa” egingo dute, eta “naturarekin harremana handitu eta bero boladak eta bero irla efektuen ondorioak gutxitzea” ekarriko duela diote udaleko iturriek, “itzal azalerak handituz eta tenperatura erregulatuz”.
Lanak maiatzaren 24ra bitarte luzatuko dituzte. Ibilgailuen joan-etorriak bermatzeko, Telefonicarako sarbidea libre mantendu beharko da egunero 8:00etatik 16:00etara. Horrez gain, aipatutako ordutegi horretan ezingo da autorik aparkatu inguruan. Orotara, 28.865,30 euroko inbertsioa egingo du udalak lanetarako.
Naturalizatzea Ekosistemetan Oinarritutako Konponbideen teknologiarekin egingo dute, Oarsoaldea Garapen Agentziak parte hartzen duen Europako SCORE proiektuaren barruan. Proiektu honek “kostaldeko hirien erresilientzia handitzea” du helburu, udaleko iturrien arabera, “itsas mailaren igoera, kosta eta ibai uholdeen eta, oro har, klima aldaketaren ondoriozko muturreko gertaera klimatikoen aurrean”.
Horrela utziko dute patioa lanen ondoren.
