Alkate txikien bila dabil Meipiko Jai Batzordea
Haurrek emango diete hasiera hilaren 24an abiatuko dituzten jaiei. Txupina nork botako duen aukeratzeko hautagaitzak aurkeztu beharko dira, marrazki bat eginez.
Meipi inguruko auzotarrek hasi dute atzera kontaketa. Hilaren 24an (ostirala) hasiko dituzte jaiak, eta dagoeneko hasi dira ordukoa prestatzen. Besteak beste, Meipiko alkate txikien bila dabiltzala jakinarazi du Meipiko Jai Batzordeak. Herriko artista txikiak marrazki bat egitera gonbidatu dituzte, aipatutako hautagaitza hori aurkezteko. Bi irabazleak (zozketa bidez aterako dituztenak) txupinazoan izango dira, jaiei hasiera ematen.
A4 tamainako marrazkiak aurkeztu beharko dira, teknika askea delarik (arkatza, akuarela, kollagea…). Hilaren 16a (osteguna da) izango da lanak aurkezteko azken eguna. 12 urtera bitarteko haurrek ahalko dute parte hartu.
Jasotako marrazki guztiak Eroskiko erakusleihoan jarriko dituzte ikusgai hilaren 17ra bitarte. Egun horretan egingo dute bi irabazleak aukeratzeko zozketa.
