Arditurriko ibilbidea luzatu eta seguruago bihurtu du udalak
2021an erori ziren egurrak konpondu ditu udalak, eta sabaian metalezko zertxak jarri dituzte. Urtero 13.000 lagunek bisitatzen dute.
1984an bukatu ziren Arditurriko meatze lanak, eta duela hamasei urte zabaldu zuten museo gisa. 2008. urtetik, gutxi gora behera, 13.000 lagunek bisitatzen dituzte erromatarren garaitik ustiatutako meategiak.
Oiartzungo Udalak hainbat inbertsio egin ditu urteetan zehar. Honakoak izan dira, besteak beste: ibilbideak osatu, lan arkeologiko sakonak egin aztarnak ikusgai jartzeko, bertan egiten zen lana ezagutarazteko dinamikak martxan jarri…
Horrez gain, bisita ibilbidea luzatzeko bigarren irteera bat ere ireki zuten. Denboraren poderioz, eta galeriako hezetasunak higatuta, luzatutako hormetan jarri zituzten egurrak erori egin ziren duela hiru urte. Ordutik itxita egon da ibilbidearen zati hori.
39.000 euroko inbertsioa
Eroritako zati hori konpontzeko lanetan aritu da udala azken hilabeteetan. Sabaia egonkortzeko metalezko zertxak jarri ditu, eta haien gainetik sare bat jarri duela jakinarazi du udalak. Modu horretan, arrokatik eror daitezkeen harritxoak jasoko lituzke.
Adierazi dutenez, lanek 39.308,28 euroko inbertsioa suposatu dute. Gainera, Eusko Jaurlaritzaren Eren 2023 programaren bitartez, ia erdia —20.440,28 euro— finantzatu dute. Egindako lanei esker, bidea larrialdi rteera moduan erabil daitekeela jakinarazi du udalak.
Egin beharreko lanak ez dira horretara mugatuko, eta bide hori bisitagarri jarri nahi dute. Ibilbideak duen aldaka igotzeko harmailak jarri nahi dituzte, eta eremua argiztatu.
