Iñigo Astiz eta Eñaut Elorrieta, Zai Zoi Elen
Idazleak eta musikariak 'Enplego zoriontsuago bat' taularatuko dute maiatzaren 19an, Landetxen. Gabriel Arestiren obra izango da ardatza.
Eñaut Elorrieta eta Iñigo Astiz, 'Enplego zoriontsuago bat'-en emanaldi batean. Zai, Zoi, Ele iniziatiba Kantagiltzak eta 1545 argitaletxeak jarri zuten martxan, duela bi urte. Literatura eta musika uztartzen dituzten ikuskizunak Oiartzunera ekartzea da helburua.
Hirugarren ekitaldian nor arituko den jakinarazi dute: Iñigo Astiz eta Eñaut Elorrieta. Enplego zoriontsuago bat ikuskizuna taularatuko dute hilaren 19an, Landetxeko auditorioan. Gabriel Arestiren lanetan oinarritutako ikuskizuna izango da gernikarrak eta iruindarrak emango dutena.
Elorrieta Ken Zazpi taldeko abeslari izan zen, eta ondoren bakarka jarraitu zuen bere ibilbidea. Iñigo Astiz kazetari eta poeta da; Berrian egiten du lan, eta 2019an Lauaxeta poesia saria jaso zuen.
Sarrerak salgai daude, online, 8 euroan. Landetxeko leihatilan eros daitezke astelehen arratsaldetan.
2022an hasi zen Zai, Zoi, Ele, Joseba Tapia eta Gotzon Barandiaranek sortutako Apoaren itzala emanaldiarekin. 2023 urteko ekitaldian Gari eta Iñigo Astiz egon ziren Landetxe Kultur Aretoan Behin bizitzea izena duen saioarekin.
