Hasi dira haurrak 'Errenterian 11 kolore' jaialdiko prestaketekin
'Errenterian 11 kolore' jaialdia Kultur Aniztasunaren Nazioarteko Egunaren bueltan izango da, hilaren 21ean dena, eta IX. edizioa izango da.
Kultura Aniztasunaren Nazioarteko Eguna izango da hilaren 21ean, eta horren harira ‘Errenterian 11 kolore’ jaialdia ospatuko dute maiatzaren 15etik 29ra. Aurtengoa IX. edizioa izango da, eta egitarau “aberatsa eta koloretsua” prestatu dute dagoeneko, herritar guztiei zuzenduta dagoena.
Herriko ikastetxe eta ludoteketan 800 haur eta gazte baino gehiago hasi dira jaialdirako eskulanak egiten, eta zehatzagoak izate aldera, kultura aniztasuna islatzen duten apaingarriak ari dira egiten Itziar Bandres artista errenteriarraren laguntzarekin. Gainera, lan horiek ikusgai egongo dira herriko kaleetan, Errenkoaldeko parte diren dendetan eta Lekuona Fabrikan, besteak beste.
Irudi nagusia, bertatik eta bertarako
Ainhoa Redondo errenteriar ilustratzaileak egin du aurtengo jaialdiaren irudi nagusia, eta Burubeltz da haren protagonista. Irudi hori herriko programazioarekin zerikusia duten karteletan eta euskarrietan ikusi ahal izango da.
Antolatzaileek esan dutenez, laster emango dute programa osoaren berri.
