Euskarazko eskaintza indartu du Blas de Lezo itsas eskolak
Aurten eskainiko diren zazpi zikloetatik lautan euskaraz ikasteko aukera izango da. Astelehenean zabalduko dute matrikulatzeko epea.
Pasaiako Blas de Lezo itsas eskolak euskarazko eskaintza indartzen jarraitzen du. Aurten eskainiko diren zazpi zikloetatik lautan euskaraz ikasteko aukera izango dute ikasleek. Euskararen normalizazioaren bidean urratsak egiten jarraitzen du eskolak.
Hortaz, DBH eta Batxilergoa D ereduan ikasi duten ikasleek Lanbide Heziketa ere euskaraz egiteko aukera izango dute herrian. Gainera, goi mailako ikasketak euskaraz egiten dituztenek B2 euskara mailaren baliokidetza eskuratuko dute, eta erdi mailakoek, berriz, B1-aren baliokidetza.
Astelehenean (hilak 6) zabalduko dute matrikulatzeko epea, eta hilaren 24ra izango da horretarako aukera.
Honako zikloak eskainiko dituzte D ereduan, hau da, euskara hutsean:
- Oinarrizko Lanbide Heziketa:
- Itsas eta arrantza jardueretako oinarrizko profesionala.
- Kirol ontziak eta laketontziak mantentzeko lanetako oinarrizko profesionala.
- Erdi mailako Lanbide Heziketa:
- Urpeko eragiketetako eta eragiketa hiperbarikoetako teknikaria.
- Goi mailako Lanbide Heziketa:
- Ontzi eta itsasontzien makineria zainketa antolatzeko goi mailako teknikaria.
