Oiarperen partiden asteburuko kartelera (2024-05-03)
Oiartzungo pilotariek 41 norgehiagoka jokatuko dituzte asteburu honetako jardunaldian. Hiru final izango dira horien artean.
Oiarperen asteburuko kartelera mardula da: 41 norgehiagokek osatzen dute. Sei atzo jokatu zituzten, eta horietatik lau Madalensoron izan ziren.
Gaur arratsaldean beste lau partida programatu dituzte Oiartzungo kantxan. Zaleek pilotarekin duten ostiraleroko zita 18:30ean hasiko da. Igandean beste lau partida jokatuko dituzte etxean, 17:30ean hasita.
Partida gehienak lehenengo faseetakoak izango dira. Hala ere, hainbat kanporaketa jokatuko dituzte, eta hiru finaletan ere arituko dira Oiarpeko pilotariak.
Lehena, gaur arratsaldean izango da. GRABNI txapelketako (Euskal Herriko pilotariek eta errioxarrek hartzen dute parte) Gazteen Mailako finalean arituko dira, Gipuzkoa ordezkatzen, Oiarpeko Leonet eta Etxeberria. Arerioa Bizkaia izango da. Gasteizko Ogetan jokatuko dute, 19:15ean hasita.
Bihar, toki berean, eta txapelketa beraren barruan baina 22 urtez azpikoetan, Amiano eta Landa arituko dira. Nafarroako ordezkarien kontra bilatuko dute txapela, 16:00etatik aurrera.
Hirugarren finala etzi —hilak 7— izango da. Ajangizko Txapelketako finala jokatuko dute Oihan Etxeberria eta Apeztegiak, Lizeaga-Bernaolaren kontra. 10:45ean hasiko da finala, Bizkaiko herriko pilotalekuan.
