Esku pilotara hurbiltzeko aukera Lezon
Ate irekien bi egun antolatu ditu Lezoko Pilota Eskolak hilaren 8 eta 15erako. Koldobike Gezala pilotalekura hurbiltzeko gonbita egin diete haurrei.
Lezoko Pilota Eskolak ate irekien jardunaldiak antolatu ditu, haurrek eskola eta esku pilota ezagutu, eta kirol horrekin gozatzeko aukera izan dezaten. Bi data jarri dituzte hurbiltze horretarako: hilaren 8a eta 15a, biak asteazkenak. Koldobide Gezala pilotalekuan izango dira eskolako kideak interesa duten haurren zain.
Hala, bi egunetan, adinaren araberako hitzorduak ezarri dituzte. 17:00etatik 18:00etara 2015 eta 2016 urteetan jaiotako haurrei egingo diete harrera, eta 18:00etatik 19:00etara 2013an eta 2014an jaiotakoei.
Gaiaz gehiago jakin nahi dutenek, honako telefono zenbakietara dei dezakete: 688 77 20 57 (Unai) eta 663 17 30 66 (Gari).
Mendekosteetako txapelketa
Eskolan ikasitakoa, praktikara eramaten dute Lezoko Pilota Eskolako kideek. Izan ere, jada hasi dira Mendekoste Jaietako eskuz binakako txapelketarekin. Horren barruko partidak asteartetan hasi dira jokatzen Josetxo Etxandi pilotalekuan, beti 17:00etan hasita. Benjamin, Kimu eta Kadete mailetako pilotari gazteei begirakoa da txapelketa.
