Oihan Etxeberriak bi txapela jantzi ditu asteburuan
Loza errioxarrarekin batera nagusitu da Bizkaiko herriko txapelketan, eta GRABNIko finala ere irabazi du, Leonetekin.
Loza eta Etxeberria, Ajangizen irabazita. Pello Errotak Ari naizela, ari naizela bertso famatuan Txirritari egotzi zion bi alkandora jantzi izana. Oihan Etxeberriak, asteburu honetan, bi txapela jantzi ditu.
Baina ez da Txirritaren eran izan, ardo-tantak lagunduta. Ari dela, ari dela, txapelketak pilatzen ari da Oiarpeko pilotaria, eta ez dituela eranztea ahaztuko.
Ostiralean GRABNIko (Euskal Herriko eta Errioxako pilotariak biltzen dituen txapelketa) finala jokatu zuen oiartzuarrak, Gasteizen, Leonet taldekidearekin. Gipuzkoa ordezkatu zuten biek ala biek, gazte mailan, baita ongi ordezkatu ere.
Bizkaiko bikotea nagusitasunez azpiratu zuten: zortzi tantoan utzi zituzten arerioak.
Atzo goizean Etxeberriak beste zita bat zuen, Ajangizen (Bizkaia). Bertako txapelketako finala —nagusien mailakoa— jokatu zuen Loza errioxarrarekin batera, eta Fernandez eta Bernaola garaitu zituzten (22-12).
Bestalde, Unax Landak GRABNIko finala jokatu behar zuen Amianorekin batera, larunbatean. Orkatilako lotailu batean bihurritu gogor bat izan duela jakinarazi du Oiarpek.
