[Irudiekin] Yakovlev 42: "Borroka egitera behartu gaituzte, eta borrokatuko gara"
Yakovlev 42ri babesa adierazteko elkarretaratzea egin dute plazan. Musika taldeak jakinarazi duenez, auzibidea aurrera doala esan die epaileak.
Herritar talde batek deituta, elkarretaratzea egin dute gaur Oiartzungo Done Eztebe plazan, Yakovlev 42 musika taldeari elkartasuna adierazteko helburuarekin. Adierazpen askatasunaren kontrako “eraso gogorra” salatu nahi izan dute. Izan ere, musika taldeko sei kide auzipetua daude, Guardia Zibilak gorroto delituagatik salatuta.
Elkarretaratzea bukatu denean deitzaileetako kide batek hartu du hitza. “Beste behin ere”, esan die plazan bildutako hamarnaka lagunei, “argi ikusi dugu errepresio indarrek ez diela atsedenik ematen herri honetako zein estatuko talde eta eragileei. Horregatik, garbi dugu horrelako erasoei erantzuna emateko garaian guk ez dugula atsedenik hartuko. Adierazpen askatasunaren kontrako erasorik ez”.
“Jaso dugun babesa izugarria izan da”
Yakovlev 42 taldeko kideak elkarretaratzean izan dira, eta eurek ere hitza hartu dute. Goizean epailearen aurretik pasatu behar izan dute, eta arratsaldeko mobilizazioan egin dute orain arte gertatutakoaren balorazio azkarra.
Lehenik eta behin, eskerrak eman dizkiete babesa helarazi dieten pertsona eta eragile guztiei, Euskal Herrikoak zein kanpokoak izan. “Izugarria izan da jaso dugun babesa, baita guk bezala pentsatzen ez dutenengatik ere”, esan dute.
Jarraitu dutenez, gaur Donostiako Instrukzio Epaitegira “behartuta” joan dira deklaratzera, antolatutako “zirkuan” parte hartzera. “Deklaraziorik egin gabe ere, bazekiten zer gertatuko zen, eta guk, tamalez, ere bai”. Jakinarazi dutenez, epaileak esan die auzibidea aurrera doala —orain ikertu izatetik auzipetu izatera pasatu dira—, “nahiz eta badakiten deliturik ez dagoela”.
Taldekoek salatu dutenez, “gutxiengo baten parte” diren zein zaurgarri diren pertsonak babesteko legea —gorroto delituaren tipifikazioa— “polizia, armada, erlijioa, enpresari zein Espainiako Estatua” defendatzeko baliatu dute. “Tamalez, Euskal Herrian badakigu nola funtzionatzen duen honek, eta badakigu Zigor Kodea batzuek bakarrik zigortzeko balio duela. Borroka egitera behartu gaituzte, eta borrokatuko gara”, iragarri dute.
Herritarrek uste baino “askatasun gutxiago” dituztela ohartarazi dute “kapitalismoak bultzatutako zibilizazio-krisiaren” testuinguruan. “Eskubidea edo askatasuna dugu soilik haiek nahi dutena erosteko, ikusteko, jateko edota abesteko. Disidentea zarenean, eta haien kontrako diskurtsoa duzunean, hor ez dago askatasunik”. Horregatik, musika taldeko kideentzako garrantzitsuak dira kalean salaketak egitea, edo ikastetxeetan pentsamendu kritikoa sustatzea. Ez hori bakarrik: “Garrantzitsua da herrietan militatzea, eta zuzentasunarengatik aldentzen den kultura sortzea”.
“Sistemak ezarritako bideari” alternatibak eraikitzea aldarrikatu dute. Streetpunk talde bat izanik, gisako beste talde baten —The Last Strength— hitzak erabili dituzte mobilizazioarekin bukatzeko: “Anaien arteko borroka, herriaren porrota da. Faxismoaren aurka, elkartasuna beti”.
