Yakovlev 42 taldekoei babesa eman diete epaitegiaren aurrean
Gorroto delituagatik ikertuta zeuden, eta eguerdian deklaratu dute. Kontseilu sozialistek babesa eman diete.
Gaur goizean elkarretaratzea egin dute Donostiako epaitegien aurrean [Arg.: Donostialdeko Kontseilu Sozialista]. Yakovlev 42 taldeko sei kidek epailearen aurrean deklaratu dute gaur goizean. Gorroto delituagatik ikerketapean zeuden, Guardia Zibilaren txosten batean oinarritutako salaketa batengatik.
Oarsoaldeko, Buruntzaldeko eta Donostialdeko kontseilu sozialistek deituta, elkarretaratzea deitua zuten taldekideek deklaratu behar zutenerako. Babesa eskaini diete Egiako epaitegien aurrean.
Ez da gaurko elkartasun keinu bakarra izango. Gaur arratsaldean, 18:30ean, beste elkarretaratze batera deitu dute Oiartzungo herritar talde batek deituta. Done Eztebe plazan izango da. Taldeak jakinarazi duenez, bertan emango dute goizekoaren berri.
“Estatu kapitalistaren bilakaera autoritarioa”
Hiru eskualde horietako kontseilu sozialistek salatu dutenez, adierazpen askatasuna ez da benetako eskubide bat, “estatu kapitalistaren kontrakoa” denean “bakarrik” zigortzen delako. “Beste behin, ikusten ari gara estatu kapitalistak hartzen ari diren bilakaera autoritarioa, aurkako zaien oro erasotzeko gai direla”, zehaztu dute.
“Gainera, argi ikusi da ezker gobernuak edota sozialdemokraziak oro har joera hori indartu besterik ez duela egin, eta bere interesen defentsan mantendu duela, esaterako”, gaineratu dute. Sozialdemokraziak “klase-ertainaren adierazpen askatasunaren defentsa” egiten duela esan dute.
Estatuek “joera autoritarioa” dutela iritzi dute, azken urteetako “krisiak” bultzatuta. Langileria errepresioa jasaten ari da kontseilu sozialisten arabera. “Horretara dator zigor kodearen gogortzea, langileriaren antolakuntza independentea antolakuntza indarrez erasotzea, oinarrizko beharren aldeko borroka kriminalizatzea edo adierazpen antifaxistak mehatxatzea”, adierazi dute.
Eskubide politikoen “defentsa” egitera deitu dute, baita adierazpen askatasunera ere. “Hortaz, errepresio kasuen aurrean klase elkartasuna antolatu behar dugu”.
