Delinkuentzia datuen txostena argitaratu dute
Delituek behera egin dute oro har, baina ziberdelikuentziak gora egin du nabarmen.
Udaltzaingoaren bulego mugikorra iztietan Joan den urteko delinkuentzia datuen txostena argitaratu dute. Txosten horrek Ertzaintzaren eta Udaltzaingoen datu bateratuak jasotzen ditu, Araba, Bizkai eta Gipuzkoako datuak lurraldeka desglosatuta, baita udalerri nagusietakoak ere, tartean Errenteria-Oreretakoak.
Txosten horretan jasotakoaren arabera, oro har, arlo gehienetan hobera egin bada ere, aipagarria dela ziberdelituen gorakada nabarmena esan du Errenteriako Udalak. Bilakaera positiboari erreparatuta, familia eremuko tratu txarrei loturiko arau hausteak erdira murriztu dira. Droga trafikoko delituak ere nabarmen murriztu direla jasotzen du txostenak Errenteria-Oreretan, 22 izatetik 9 izatera pasa baitira. Lapurretei lotutakoak ere behera, modu apalean azken horiek. Bereziki aipagarria udalak nabarmendu duenez, enpresetan indarra erabiliz egindako lapurreten beherakada, “%85 jaitsi dira”.
“Udaltzaingoaren eta Ertzaintzaren iritziz, ohiko delituez harago ez dago une honetan herri mailan kezka berezia eragiten duen errealitate zehatz edo foku berezirik, sexu erasoen eta ziberdelituen pisu erlatibo gero eta handiagoa ez bada”, nabarmendu dute udaletik. Sexu erasoen kasuan, sentsibilizazio gero eta handiagoa eta lege aldaketa igoeraren kausatzat har daitezkeela diote.
Ziberdelituen igoera esponentziala
Errenteria-Oreretaren kasuan 1.000 biztanleko arau hauste penalen kopuruak 4,5 puntu egin du gora, 41,4ean kokatzeraino. Gipuzkoakoa 44 puntukoa da eta Araba, Bizkai eta Gipuzkoakoa 47,5ekoa. Iaz emandako arau hauste penalen igoera, delitu informatikoen gorakada nabarmenaren ondoriotzat jo dute, ia %60 egin baitute gora mota horretako delituek udalerrian eta inguruko herrietan.
Txostena osorik hemen klik eginda kontsulta daiteke.
