Donibane Lohizuneko hilketa matxista salatu du udalak
Erailketa salatzeko Euskal Herriko mugimendu feministak deitutako mobilizazioekin bat egin du erakundeak.
Joan den ostiralean Donibane Lohizunen izandako hilketa matxista salatu du Pasaiako Udalak. Ohar batean adierazi duenez, biktimaren senideei zein gertukoei “elkartasuna adierazteaz gain, hilketa salatzeko Euskal Herriko mugimendu feministak deitutako mobilizazioekin bat” egin du erakundeak.
Gertakari honen harira, udaleko iturriek “publikoki eta aho batez” adierazi dute “emakumeen aurkako indarkeria gaitzesten” dutela: “Horrelako gertaerak ez ditugu gure gizartean onartzen, eta erakunde, elkarte eta herritarrok lanean jarraituko dugu, indarkeria matxistarik gabe bizi gaitezen”, esan dute.
2024an Euskal Herrian indarkeria matxistak utzitako lehenengo biktima izan da Donibane Lohizunekoa. 2003tik, 119 emakume eta 12 haur hil dituzte.
