Oreretako Bidea berritzen hasiko dira, abuztura arte
Arraguan hasiko dituzte obrak, eta zatika joango dira, Elizalderainoko bi kilometroak satu arte. Trafikoan eragina izango du.
AP-8aren sarreraren inguruan hasiko dira obrak [Arg.: Google]. Arragua eta Gurutze auzoak konektatzen ditu Oreretako Bidea errepideak. Gipuzkoako Foru Aldundia lanak egiten hasiko da, bere eskumenekoa baita GI-2134 izeneko errepideak. Zehazki, Arragua eta Elizalde auzoen artean dauden bi kilometroak konpondu eta eraberrituko ditu, AP-8 autobideko sarreratik Ollarriarre aparkalekuraino.
Jakinarazi dutenez, Arraguan hasiko dira lanak, eta zatika izango dira. Lau hilabete iraungo dutela aurreikusi dute, maiatzetik abuztura bitartean.
Trafikoan eragina
Gune bakoitzaren egoeraren araberako lanak izango dira. Bide osoko asfaltoa urratu eta berria botako dutela jakinarazi dute, eta zati batzuetan konponketa sakonagoa egingo dute, azpiko kapak finkatzeko.
Aurreratu dutenez, ez dute errepidea itxiko, baina lanean arituko diren eremuan errail bakarra egongo da irekita, semaforo batek araututa. Trafikoan eragina izango dute lanek, modu batean edo bestean.
Oiartzungo Udalak jakinarazi duenez, Xorrola, taxibusa eta Ekialdebuseko zerbitzuen ordutegietan edo aurreikusita dauden kirol probetan eraginik ez izateko, obrak gauzatuko dituen enpresarekin koordinazio lanetan dabiltza. “Ibilbidean edo ordutegian aldaketa puntualik egin beharko balitz aurrez jakinaraziko da”, berretsi dute.
