Astelehen Goizak taldeak 'Nondik' estreinako diskoa entzungarri jarri du
Plataforma ia guztietan eskura daitekeela jakinarazi dute. Datorren ostiralean Landetxeko oholtzan aurkeztuko dute.
Oiartzungo agertoki musikala emankorra da, eta gaur bertan beste fruitu bat eman du. Astelehen Goizak taldeak Nondik diskoa atera du. Gitarren riff-ak eta doinu popzaleagoak nahasten dituen diskoak dozena bat abesti ditu.
Taldekideek jakinarazi dutenez, ia plataforma guztietan entzun ahal izango da; Spotifyra igotzea laster espero dute, Astelehen Goizak-ek bere Instagrameko kontuan adierazi duten moduan. Teknikaria Maikel izan da (MIK estudiokoa) eta Lezotin grabatu dute diskoaren gehiengoa; Gorka Lezoti grabaketa laguntzailea izan da eta Miguel Demborak masterizazioa egin du.
Taldeak datorren ostiralean, hilak 10, aurkeztuko du disko berria, etxean. Landetxeko auditorioko oholtzara igoko dira, 22:30ean hasiko den emanaldian. Nondik diskoa aurkeztu ondoren, Mugan Donostiako taldea arituko da, jaialdia ixteko.
Sarrerak udalaren webgunean daude, 8 euroan.
