Fanderiako igerilekua astelehenean zabalduko dute berriro
Igerilekuko estalkia aldatu eta berritzeko lanak amaituta astelehenean, hilak 13, zabalduko ditu ateak berriro.
Fanderiako Igerilekuak estalki berria du. Argazkia: Herri Bizia Lanak bukatuta, astelehenean zabalduko ditu ateak, berriro, Fanderiako igerilekuak. Hala jakinarazi dute gaur Aizpea Otaegi alkateak eta Leire Mazizior Kiroletako zinegotziak igerilekuen instalazioetan bertan egin duten agerraldian. Igerilekuko estalkia aldatu eta berritzeko lanak bukatuta, igerilekua eta hidroterapia eremua betetzeko eta martxan jartzeko behar diren maniobrak egin dituzte aste honetan zehar.
Gogora ekarri dute bi udal ordezkariek joan den urtean erabaki zuela udalak igerilekuko estalkia osorik eraberritzea, Fanderiako instalazioen estalki mugikorraren egoerari eta egiturari buruz txostena egin ondoren, “lanen helburua instalazioen segurtasuna mantentzea, eta instalazioak hobetzea izan da. Izan ere, igerilekuetarako sarbidea hobetu da udarako, eta neguan erosoago erabiltzeko aukera emango du”.
Estalkia ordezkatzearekin batera, bestelako lanak ere egin dituzte Fanderian. Besteak beste, klimatizazio sistemaren hodiak aldatu dituzte, “horri esker, ezin hobea izango da sistemaren errendimendua eta horrenbestez, energia asko aurreztuko da instalazioaren kontsumoan”. Obrak martxan jarri ondoren erabaki zela hobekuntza hori proiektuan txertatzea azaldu dute, “horrek eragin du hasieran emandako epea luzatu izana”.
Alboko fatxadetan ate irristailuen sistema era jarri da, “berdegunearekin kontaktu handiagoa lortzeko eta eraikina iragazkorra izateko”.
637.155 euroko inbertsioa
Lanak egiteko 637.155,48 euroko inbertsioa egin du udalak, eta kontratuan zehaztutako epean egin dira lanak. Gipuzkoako Foru Aldundiko Gazteria eta Kirol sailak 167.525 euroko diru laguntza eman dio udalari, aurtengo Gipuzkoako Kirol Ekipamenduen Planaren barruan.
Fanderiako igerilekuaren ordutegia gogorarazi dute azkenik. astelehenetik ostiralera 07:00etatik 22:00etara izango da zabalik, larunbatetan 09:00etatik 21:30era, eta igandetan 09:00etatik 14:00etara. Ekainaren 17tik aurrera udako denboraldia hasiko da eta horrekin batera ordutegian aldaketa izango da, izan ere, egunero 09:00etatik 22:00etara izango da zabalik.
