BIBE proiektuak lehen urratsak egin ditu Lezon
Adinaren araberako hiru taldetan banatuta, zahartzaroaren gaineko gogoeta egin dute lezoarrek egitasmoaren barruan.
Prozesuan parte hartzen ari den taldeetako baten irudia. Argazkia: Lezoko Udala. Bizitza Berria eta Betea (BIBE) egitasmoa abiatu dute Lezon. Gipuzkoako Foru Aldundiko Adinberri fundazioaren proiektua da, eta zahartzaroak gizarte aurreratuetan duen erronka garrantzitsuenetako bati erantzun nahi dio: zahartzaroan bizitza oso bat lortzea eta gero eta urte gehiago bizi diren pertsonez osatutako gizarte baten aurrerapena eta kohesioa lortzea. Lezoko Udalaren laguntzarekin ari dira garatzen herrian, eta Aiton Borda erretiratuen elkartearen ezinbesteko partaidetzarekin. Era berean, Eusko Jaurlaritzaren Berpiztu programaren barrukoa da BIBE.
BIBE Adinberrik duen lehentasunezko ildo bat da, eta gipuzkoarren ekarpena izan nahi du longebitatearen eta bizitza betearen paradigma berria garatzeko. Proiektu aitzindaria da, eta Lezoko adineko pertsonei zuzenduta dago, haiek dira programaren protagonistak. Hala, egitasmoaren barruko lehen bi saioak jada eginak daude Lezon, hilaren 2an eta 3an hain zuzen ere.
Maiatza hasierako bi egun horietan egindako bileretan 57-75 adin tarteko 24 lezoarrek parte hartu zuten, adinaren araberako taldeetan banatuta: bat, jubilatzear dauden 57-62 tartekoena; bestea 63-67 tartekoena edo jubilatu berriena; eta hirugarrena erretiratua urteak daramatena, 68-75 tartekoak. Hala, zahartzaroaren ikuspegi berrian funtsezkoak diren alderdien gaineko gogoeta egin zuten denek, eta adin tarte bakoitzekoen beharrak kontuan izanda, honako ondorio orokorrak atera zituzten taldeetatik:
- 57-62 adin tartekoen taldea: “Jubilazio aktibo bat espero dugu, gustatzen zaizkidan eta garatuko gaituzten gauzak egitea”.
- 63-67 adin tartekoen taldea: “Besteei denbora eskaintzea erdiesten dizu jubilazioak. Askotan, gure arazoak estaltzeko erabiltzen dugu lana, baina jubilatzean ez duzu irtenbiderik”.
- 68-75 adin tartekoen taldea: “Jubilatzen zarenean, aprobetxa ezazu denbora. Jarraitu aktibo, harremanak egin, baina ez gehiegi estutu. Bakardadeak eta gizartearentzako baliogarri ez izateak beldurtu egiten gaitu”.
