[Erreportajea] Korrika egiteko pasioak elkartu ditu
Lehiatzeko grina izan ala ez, Trikaia atletismo taldean korrika zale guztiek dute tokia. Ordainpeko klub batek eskaintzen duena aurkitu dute hamarka lagunek taldean, doan gainera.
Taldean badira lehiatzeko grina dutenak, elkarrekin parte hartzen dute lasterketetan. Azken urte hauetan, igandero, korrika egiteko zapatilak jarri eta lagun artean tipi-tapa aritzen da Trintxerpeko lagun talde bat. Korrika egiteko pasioak elkartu zituen orain dela bi urte, eta ordutik, etengabe handitzen joan da talde hau, baita horren asmo eta helburuak ere.
Karmengo Amaren festetako 5 kilometroko lasterketa antolatu zuten 2021n estreinakoz, elkarlanean, inongo elkarte edo talderen babesik gabe. Lehenengo hartan 70 lagunek eman zuten izena. Bigarrenean 170ra heldu ziren partaideak, eta izandako arrakasta ikusirik, talde bat sortzeari ekin zioten. 2024ko urtarrilean aurkeztu zuten hori: Trikaia atletismo taldea. Unai San Sebastian taldekideak euren asmo eta helburuak azaldu ditu. «Kirola egiteko ohitura berpiztu nahi dugu, gauzak erraztu nahi dizkiogu jendeari, ez baita gauza bera bakarrik edo lagun artean korrika egitea».
Mundu horretan murgildu nahi dutenek edota urteetako esperientzia dutenek. Denek dute txoko bat taldean, hori argi utzi nahi izan du San Sebastianek. «Helburua ez da lehiatzea, ez goaz denboren bila. Igande honetan [hilaren 5ean] Hondarribia 10K lasterketan taldeko hamazazpi lagun izan gara. Podium bat lortu genuen, eta beste batzuk ia-ia azkenak iritsi ziren. Taldean kilometroa hiru minutuan egiten dutenak ditugu, baina baita zazpi minutuan ere. Denetik daukagu, eta hori da gure asmoa, sare handi eta askotariko bat sortzea», erantsi du korrikalariak. Egun, 52 korrikalari daude taldean.
Oroitarazi du taldeko kide izatea erabat doakoa dela, eta talde baten parte izateaz gainera, onurak dituztela partaideek, entrenatzaile, nutrizionista eta masajista zerbitzua tartean. Jon Elkano errenteriarra dute entrenatzaile, esperientzia eta eskarmentu handikoa. «Askotan bakarrik goaz korrika eta ez dakigu egoki ari garen, eta Elkano ezinbesteko laguntza da horretarako».
Ordainpeko kluben parean jarri du Trikaia San Sebastianek: «Ez da beharrezkoa klub batean egotea. Ordainpeko klub handi batek eskaintzen duena eskaintzen dugu, edo gehiago».
Uztailaren 14an izango dute hurrengo hitzordu handia, Karmengo Jaitan. Hurrengo urterako, baina, lau barrutiak elkartzeko asmoa dutela iragarri du San Sebastianek, 10 kilometroko lasterketa eder batekin.
Taldekoekin harremana egiteko, @trikaiatletismokluba Instagram kontura jo daiteke. Pasaitar eta inguruko herritar oro animatu ditu horretara.
Trikaia taldeko kideak, Irunen.
