[Erreportajea] «Lezoarrei esker mezua zabaldu nahi diegu paella jatearekin»
Lezokoak elkarteak 400dik gora lezoar bilduko ditu bihar Karlos Saldise plazan. Paella erraldoiaren bueltan, herriko establezimenduetan erosketak egiten dituztenei aitortza egin nahi diete.
Iazko paella jatea arrakastatsa izan zen. Aurten errepikatzea erabaki dute. Lezokoak Handia antolatu du biharko (larunbata) Lezokoak Merkatari, Ostalari eta Zerbitzuen Elkarteak. Herri paella jatea egingo dute Karlos Saldise plazan, 14:00etan. Lezokoak-eko ordezkariek Hitza-ri zehaztu diotenez, 400dik gora dira bertan izateko aukera eskuratu duten lezoarrak. «Badakigu egun ez dela erraza Lezon erosketak egitea, inguruan herri handiak eta merkataritza gune erraldoiak ditugulako. Horregatik, lezoarrei esker mezua zabaldu nahi diegu paella jatearekin. Ematen digutena, itzuli nahi diegu nolabait», esan dute elkartekideek.
Otordurako txartelak zozketa bidez banatu dituzte. Hala, elkarteko 38 establezimenduk parte hartu dute paella jatearen egitasmoan, eta bakoitzak egokien ikusi duen erara zozkatu ditu txartel horiek. «Iaz lehenengoz egin genuen paella jatea. Sekulakoa izan zen bildu zen jendetza eta jaso genuen babesa. Horri jarraipena eman nahi genion».
Hazten ari da Lezokoak. Horren adierazle, azken asteetan bost bazkide berri batu zaizkiela. Hala, elkartearen zuzendaritzak herriko establezimenduen atxikimendua oso baikor baloratu du.
Biharkoa bazkari soila baino gehiago izango da. Hala, mahaietan biltzen direnek euskal kantuen letrak izango dituzte plater bakoitzean, horiek elkarrekin abesteko. Gainera, Lezokoak-eko establezimenduek emandakoei esker, bertaratzeko aukera izan dutenen artean hainbat zozketa egingo dituzte. Beraz, ondo jan, euskal kantekin gozatu, eta etxera oparitxoarekin joateko aukera izanen da. Nola ez, herriko tokiko establezimenduak babestuz.
