'0.0 hondakin' kanpaina abiaraziko dute merkataritzan eta ostalaritzan
Parte hartu nahi duten establezimenduetako hirurekin sakonean landuko dute hondakinen bereizketa, gainontzekoentzako eredu izateko.
Errenteriako Udalak iragarri du beste pauso bat emango duela hondakinen bereizketan. Gaikako sistema berria ezarri zuten duela zazpi urte. Adierazi dutenez, urtez urte “ahalegin berezia” egiten ari dira birziklatze-tasa ahalik eta altuena lortzeko. Hainbat sentsibilizazio kanpaina egin dituzte azken urteetan.
Orain merkataritza eta ostalaritzan jarriko dute fokua. Udalak nabarmendu du establezimenduetan sortutako hondakin kopurua oso handia dela, eta “zer hobetua” badagoela. Horregatik, 0.0 hondakin kanpaina abiaraziko dutela jakinarazi dute.
Kanpaina herriko jatetxe, taberna, janari prestatuak eskaintzen dituzten denda eta frutategietara zuzenduko zaie, gehienbat. Kanpainan parte hartzeko interesa duten guztien artetik hiru aukeratuko dituzte. Horiekin modu sakonean landuko da hondakinen kudeaketa, bai prebentzioan baita gaikako bilketa ere.
“Kudeaketa jasangarri hori eredugarria izango da herriko gainerako establezimendu guztientzat eta ziurtagiria jasoko dute”, adierazi du udalak.
Establezimenduak hasi dira jasotzen informazio gutunak, aste honetan bertan. Kanpainan izena eman daiteke hilaren 22ra arte.
