Oiarperen asteburuko partiden kartelera (2024-05-10)
Oiartzungo pilotarien kartelera osatzen dute 40 norgehiagokek. Oiartzunen bost partida jokatuko dituzte gaur, sei bihar eta beste hiru etzi.
40 partida. Horiexek izango dira asteburu honek dakarren kopurua. Oiarpekoak atzo hasi ziren lehian, hiru partidarekin.
Gaur arratsaldean bost partida jokatuko dituzte etxeko kantxan, 18:00etan hasita. Biharko partida kopurua dozena erdikoa izango da, eta pixka bat lehenxeago hasiko dira, 17:30ean. Igandean ere izango da Madalensorora jaisteko —edo igotzeko— aukera: hiru norgehiagoka jokatuko dituzte bertan, 17:00etan hasita.
Partida guztiak dira garrantzitsuak, baina batzuk beste batzuk baino gehixeago. Sei kanporaketa jokatuko dituzte, guztira, oiartzuarrek. Igande goizean, Lesakan, Benito Taintaren omenezko txapelketaren bigarren kanporaketak jokatuko dituzte Oiarpeko hiru bikotek.
Egun berean, Galardik, Balerdirekin batera, Uribesalgo eta Cresporen kontra arituko dira, Antzuolako san Idro Txapelketako Haur Mailan, nesketan.
Oihan Etxeberriak —igandean baita ere— Aingeru Bernaolaren kontra jokatuko du Masters Kaiola lau t’erdiko txapelketako finalerdian. 22 urtez azpikoen kategorian izango da, Zornotzako pilotalekuan.
Seigarren kanporaketa asteartean izango da, Ataunen. Etorkizuneko Txapeldunak —22 urtez azpikoa— txapelketan Leonetek Ibarluzearekin batera jokatuko du final hamaseirena. Kontrarioak Saez ataundarrak eta Santesteban Oberenakoak osatzen duten bikotea izango da.
