Josu Ibarguren Elosegi, bosgarren Gipuzkoa Bertsotan-eko bere saioan
Emaitza horrekin bertsolari oiartzuarrak ezin izango du Gipuzkoa Bertsotan-en hurrengo faserako jauzia egin.
Ibarguren, Mutrikuko saioan. Josu Ibarguren Elosegi bertsolari oiartzuarra bosgarren izan zen Gipuzkoa Bertsotan lehiaketaren barruko haren saioan, 279,5eko puntuazioarekin. Mutrikun izan zen, joan den asteko ostegunean. Saio horretan Manex Astigarraga Bergara debarra izan zen garaile (321 puntu) eta haren segidan sailkatu zen Izarne Zelaia Arratibel zizurkildarra (302 puntu).
Gipuzkoa Bertsotan udaberrian zehar egingo da, eta udazkenean egitekoa den Gipuzkoako Bertsolari Txapelketaren sailkapen aro antzekoa da, bi fasekoa. Hala, lehen fasean 74 bertsolari hasi dira bertsotan, bigarrenerako 48 sailkatuko dira, eta handik 36 aterako dira udazkenean Gipuzkoako Bertsolari Txapelketarekin bat egiteko: orduan izango dituzte zain 2019ko Gipuzkoako Bertsolari Txapelketako finalerdietara iritsi ziren bertsolariak.
Emaitza horrekin Gipuzkoa Bertsotan-en A multzoko 34. postuan da Ibarguren; B multzoan 25 dira jada hark baino puntuazio hobea eskuratu duten bertsolariak (Bko saio bat egiteke da oraindik). Beraz, konfirma daiteke udaberriko Gipuzkoakoaren atarikoaren bigarren fasera ez dela sailkatu oiartzuarra, 48koa baita han izango direnen zerrenda.
