Bi batengatik egingo dute ekainaren 8an: olinpiadak eta Eskertza Eguna
Biyurrieneak egun indartsua antolatu du. Goizean ginkanarekin hasiko dira, eta dj-arekin bukatuko dute goizaldean.
Iazko martxoan egin zuten, estreinakoz, Eskertza Eguna. Biyurrieneak gorriz markatzeko data baten berri eman du: ekainaren 8a. Egun horretan festa handia ospatuko dute Oiartzunen, goizetik gauera.
Otsailean abiarazi zituzten gazte olinpiadak, Baga, Biga, Liga izenarekin. Ordutik, hilean behin elkartu dira probak lehiatzeko, eta ekainaren 8a izango da klausura ekitaldia. Ginkana egingo dute goizean zehar, eta protokolo olinpikoa egingo dute ondoren.
Eskertza Eguna
Baga, Biga, Ligaren azkeneko jardunaldiarekin ondoren, Eskertza Egunaren txanda izango da. Iaz egin zuten estreinakoz. Helburua honakoa zen: Biyurrieneak antolatutako ekitaldietan zein xanistebanetako Gazte Egunean lanean aritu direnei aitortza egitea, baita ekitaldietara hurbildu direnei eskerrak ematea ere.
Olinpiaden eta Eskertza Egunaren arteko zubi-lanak egingo dituen bazkariarekin hasiko dira arratsaldeko ekitaldiak. Izena emateko galdetegia prestatu dute, eta txartel bakoitzak 20 euroko prezioa izango du. Hilaren 31 izango da izena emateko azkeneko eguna.
Bazkari eta bazkalondoaren ondoren, musika izango da nagusi. Honakoa izango da egitaraua:
- 18:00etan: Gabezin.
- 21:30ean: Dj Fifi eta Fefa.
- 23:30ean: Modus Operandi.
- 02:00etan: Dj Fresa Morango.
